बाग्लुङ । बाग्लुङको ताराखोला गाउँपालिका– ३ हिलको शिरमा रहेकाे खिउ बराह ताल प्रचारप्रसारको अभावमा ओझेलमा परेको छ। करिब तीन हजार एक सय मिटरको उचाइमा रहेको यो तालबाट कैयन हिमाल देख्न सकिन्छ। तर, पदमार्ग र मोटरबाटोको पहुँच नहुँदा ताल ओझेलमा परेको छ।
पर्यटकीय दृष्टिकोणले सम्भावना बोकेको भए पनि पूर्वाधार निर्माण र प्रचारप्रसार नहुँदा पर्यटक पुग्न नसकेका स्थानीय कृष्ण अठारे मगरको भनाइ छ। ‘तालसम्म पुग्नका लागि सडकको पहुँच वा पदमार्ग निर्माण हुन सकेको छैन,’ उनले भने, ‘तालसम्म पहुँचका लागि पूर्वाधार निर्माण हुने हो भने पर्यटकीय गतिविधि बढ्ने थियो।’
स्थानीय नीरज बगालेले यतिवेला आफूहरू ताल संरक्षण र प्रचारप्रसारमा जुटेको बताए। उनले स्थानीयहरू तालछेउछाउ कहिलेकाहीँ वनभोजका लागि जाने गरे पनि बाहिरबाट आउने पर्यटक नभएकाे उल्लेख गरे।
गाउँपालिकाले गत आर्थिक वर्षमा ताल संरक्षणका लागि रु. चार लाख बजेट विनियोजन गरेको थियो भने यस वर्ष प्रदेश सरकारले सहयोग गरेको उनले जानकारी दिए। ‘स्थानीय, प्रदेश र संघबाट आवश्यक बजेट विनियोजन गरी ताल संरक्षण र संरचना निर्माणमा लाग्ने हो भने पर्यटकको संख्या बढाउन सकिन्छ,’ उनले भने।
ताल संरक्षण तथा विकास प्राधिकरण गण्डकी प्रदेशले पनि यसका लागि पहल सुरु गरेको छ। यस वर्ष प्रदेश सरकारले विनियोजन गरेको रु. १० लाख बजेटबाट ताल मर्मत सम्भार गरिने ताल संरक्षण तथा विकास प्राधिकरणका कार्यक्रम अधिकृत रणबहादुर विकले जानकारी दिए।
‘बाग्लुङका तीनवटा ताल यस वर्ष संरक्षण र मर्मत–सम्भार हुँदै छन्,’ उनले भने, ‘ताराखोलाको खिउ बराह, ढोरपाटनको रुद्र र तामानखोलाको बराह तालमा काम भइरहेको छ।’ ताराखोला गाउँपालिकाका उपाध्यक्ष भीमबहादुर रोकाले ताराखोला गाउँपालिकामा भएका तालतलैया र धार्मिक स्थलको प्रवर्द्धनका लागि नीति बनाएर अघि बढाउने बताए।
‘हाम्रो पालिकाअन्तर्गत धेरै पर्यटकीयस्थल छन्, केही स्थलमा पूर्वाधार निर्माण भइसकेका छन् भने अझै केहीमा काम हुन बाँकी छ। खिउ बराह तालको विकासलाई मुख्य प्राथमिकतामा राखेर काम गर्नेछौँ,’ उनले भने।
उनले पर्यटन क्षेत्रको विकास गरी स्थानीयको आयआर्जन बढाउने र जीवनस्तर उकास्ने गरी योजना बनाएको दाबी गरे। खिउ बराह तालबाट धौलागिरि, माछापुच्छ्रे, अन्नपूर्णलगायत दर्जनौँ हिमशृंखलासँगै बाग्लुङका विभिन्न स्थान र म्याग्दी, गुल्मी, अर्घाखाँचीलगायत जिल्लाका दृश्य देख्न सकिन्छ। रासस
