नागरिकहरुले राजनीतिक नेतृत्व परिवर्तन खोजिरहेका छन् : थापा

काठमाडौं । नेपाली कांग्रेसका महामन्त्री गगन थापाले निर्वाचनपछिको चूनौती सामना गर्न गठबन्धन दलहरु तयार हुनुपर्ने बताएका छन् ।
मंगलबार काठमाडौंमा काभ्रे–काठमाडौं ४ समन्वय समितिले आयोजना गरेको कार्यक्रममा थापाले मंसिर चारको निर्वाचन गठबन्धन नै जित्ने भन्दै त्यसपछिको चूनौति सामना गर्न दलहरु तयार हुनुपर्ने बताएका हुन । उनले देशमा देखिएका आर्थिक लगाएतका समस्या समाधान गर्न निर्वाचन पछि बन्ने सरकार गम्भीर भएर लाग्नुपर्ने चूनौति रहेको बताए ।
आम नागरिकमा देखिएको निराशालाई पनि गठबन्धनले निर्वाचन जितेपछि दृढ संकल्पका साथ हटाउनुपर्ने उनको भनाई छ । थापाले पाँच बर्षका लागि गठबन्धनसंगै बसेर मत मागेकाले आगामी पाँच बर्ष जनताको मतको इज्जत राख्नुपर्ने धारणा राखेका छन् । उनले जनताले दिएको जिम्मेवारीबाट असफल भए त्यसको मूल्य देशले चूकाउनुपर्ने भएकाले इमान्दारीपूर्वक काम गर्नुपर्ने बताएका छन् । थापाले नागरिकहरुले राजनीतिक नेतृत्व परिवर्तन खोजिरहेको भन्दै कांग्रेसको नेतृत्व परिवर्तन गरि मुलुक चलाउनका लागि आफ्नो पक्षमा मत माग्न आग्रह गरेका छन् ।
थापाले घरदैलोका क्रममा जनताका बिभिन्न प्रश्न रहेको भन्दै आफु प्रश्नको सामना गरेर जनताको समस्या बुझ्ने जिकिर गरेका छन् ।