काठमाडौं । निर्वाचन आयुक्त डा. जानकी कुमारी तुलाधरले मतदानमा खसेको मत बदर नहोस् भन्ने आयोगको लक्ष्यमा सघाउन समुदायस्तरमा मतदातालाई सही सूचना दिएर सुसूचित मतदाता तयार गर्न सञ्चारकर्मीलाई आग्रह गरेकी छिन् ।
मंसिर ४ गते हुने प्रतिनिधि सभा तथा प्रदेश सभा सदस्यका निर्वाचनका लागि आयोगले कर्णाली प्रदेशको सुर्खेतमा सञ्चालन गरेको प्रदेशस्तरीय मिडिया अभिमुखीकरण कार्यक्रमको आज उद्घाटन गर्दै आयुक्त डा. तुलाधरले निर्वाचनलाई स्वतन्त्र, निष्पक्ष र भयरहितरूपमा सम्पन्न गराउन आयोग लागिरहेको बताउँदै निर्वाचन आचारसंहिताको अनुगमन र पालनामा सञ्चार क्षेत्रको महत्वपूर्ण भूमिका रहने उल्लेख गरेकी हुन ।
उनले निर्वाचनको सञ्चालन, व्यवस्थापन, नियन्त्रण र रेखदेखका लागि संविधानले दिएको जिम्मेवारी पूरा गर्न आयोग कटिबद्ध रहेको र आचारसंहितामा पहिलो पटक मिथ्या सूचना, दुष्प्रचार र द्वेषपूर्ण अभिव्यक्तिलाई परिभाषित गरी त्यसलाई नियमनको व्यवस्था गरिएको बताएकी छिन् ।
आयोगका सूचना र गतिविधिबारे आममतदाता र सञ्चारमाध्यमको सहज पहुँचका लागि आयोगले प्रेस अफिसको सञ्चालन, निर्वाचन इ बुलेटिनको सञ्चालन र टोल फ्रि नम्बर ११०२ बाट कल सेन्टरको सञ्चालन भइरहेकाले त्यसबाट लाभ लिन उनले आग्रह गरेकी छिन् ।
मिडियाको भूमिका स्थानीय तहको निर्वाचनमा सशक्त रहेको आफूहरूले पाएको उल्लेख गर्दै आयुक्त तुलाधरले भनिन्, ‘निर्वाचन आचारसंहिताको कार्यान्वयनमा आयोग कडाइका साथ प्रस्तुत भएको छ । निर्वाचनका लागि अब १९ दिन मात्र बाँकी रहेको अवस्थामा कात्तिक १७ गतेदेखिको निर्वाचन प्रचारप्रसार अझै पेचिलो हुने देखिन्छ । यस सन्दर्भमा सञ्चार र सबै क्षेत्रको सहयोगविना निर्वाचन सम्पन्न गराउन कठिन हुनेछ ।’
आयोगले सबै गतिविधि संविधान, ऐन, निर्देशिका र कार्यविधिअनुसार गरिरहेको अवगत गराउँदै उनले सम्बन्धित पक्षसँगको समन्वय र सहकार्यमा जोड दिइएको स्पष्ट पारेकी छिन् ।
आयुक्त तुलाधरले सञ्चारकर्मीप्रति आयोगको ठूलो विश्वास रहेकाले आयोगले आचारसंहिताको अनुगमनलगायतका संरचनामा सञ्चार क्षेत्रको प्रतिनिधित्वलाई अभिन्न अंगका रूपमा व्यवस्था गरेको र यस प्रकारको मिडिया अभिमुखीकरण ७७ वटै जिल्लामा सञ्चालन गरी मतदाता जागरण र आचारसंहिताबारे स्पष्ट जानकारी दिइएको बताएकी छिन् ।
सुर्खेतका मुख्य निर्वाचन अधिकृत, प्रमुख जिल्ला अधिकारीलगायतको उपस्थिति रहेका कार्यक्रमको दोस्रो सत्रमा आयोगका तर्फबाट सहसचिव एवं प्रवक्ता शालिग्राम शर्मा पौडेल र राष्ट्रिय समाचार समिति (रासस) का तर्फबाट महाप्रबन्धक सिद्धराज राईले प्रस्तुतीकरण गरेका छन् ।
