काठमाडौँ । राप्ती नदीमा विद्यार्थी चढेको डुंगा पल्टिएको छ ।
बिहीबार बिहान ९ बजे विद्यालयतर्फ जाँदै गरेको डुंगा राप्ती नदीमा पल्टिँदा उक्त डुंगामा सवार १९ जना विद्यार्थी घाइते भएका हुन् ।
लमही नगरपालिका–९ तरुलियाबाट राजपुर गाउँपालिका–७ स्थित मावि सिक्टातर्फ राप्ती नदी तरेर जार्दै गर्दा विद्यार्थी चढेको डुंगा पल्टिएको हो । क्षमताभन्दा बढी विद्यार्थी बोक्दा डुंगा पल्टिएको इलाका प्रहरी कार्यालय अमिलियाले जानकारी दिएको छ ।
उक्त डुंगा नदीको बीचमा जमिन सतहदेखि करिब १० मिटर टाढा पल्टिएको थियो । डुंगामा सवारमध्ये तीनजना विद्यार्थी डुबेर बेहोस भएका थिए । नदीको बीचमा डुंगा पल्टिएको देखेपछि स्थानीयले उनीहरुलाई उद्धार गरेका थिए ।
उद्धारपछि विद्यार्थीलाई अस्थायी स्वास्थ्य चौकीमा उपचारका लागि लगिएको र उनीहरुको अवस्था सामान्य रहेको बताइएको छ । घाइते विद्यार्थीहरु मावि सिक्टामा कक्षा ६ देखि ९ कक्षामा अध्ययनरत रहेका छन् ।
