एसपीपी सम्झौता कुनै हालतमा अघि बढ्दैन : प्रचण्ड

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले अमेरिकासँगको स्टेट पार्टनरसिप प्रोग्राम(एसपीपी) सम्झौता कुनै हालतमा अघि नबढ्ने स्पष्ट पारेका छन् ।
रितबहादुर खड्का स्मृति दिवसका अवसरमा बिहीबार काठमाडौंमा भएको कार्यक्रममा प्रचण्डले वर्तमान सरकारले एसपीपी सम्झौता गर्न लागेको झुटो प्रचार भएको भन्दै कुनै सैन्य सम्झौता नहुने स्पष्ट पारेका हुन । राष्ट्रवादको पाखण्डी प्रचारले केही नहुने उल्लेख गर्दै प्रचण्डले उक्त सम्झौता केपी शर्मा ओली प्रधानमन्त्री हुँदा अघि बढेको आरोप लगाएका छन् । प्रधानमन्त्रीले समेत कुनै पनि हालतमा त्यस्तो सम्झौतामा जान्न भनेर प्रतिवद्धता जनाइसकेको प्रचण्डले बताएका छन् ।
अध्यक्ष प्रचण्डले गठबन्धन नेपालको राष्ट्रिय स्वाधिनता, विकास र समृद्धिको पक्षमा दृढताका साथ उभिने बताएका छन् । त्यस्तै उनले स्थानीय तहको निर्वाचनमा कांग्रेसले बढि वा अरु दलले कम सिट जिते पनि परिवर्तनका पक्षधरको बिजयी भएको उल्लेख गरेका छन् । अव प्रदेश र संघको निर्वाचन पनि सहकार्यका साथ सम्पन गर्नुपर्ने भन्दै उनले परिवर्तनलाई उल्टाउनेलाई परास्त गर्नुपर्ने जिकिर गरेका छन् ।
उनले बिभिन्न आन्दोलनका सहिदहरुकै कारण मुलुकमा परिवर्तन सम्भव भएकाले परिवर्तन जोगाउदै अघि बढ्ने धारणा राखेका छन् ।