काठमाडौं । प्रमुख प्रतिपक्षी दल नेकपा (एमाले)का अध्यक्ष केपी शर्मा ओलीले अमेरिकन सहयोग मिलिनियम च्यालेन्ज कर्पोरेशन (एमसीसी)का बारेमा सबैभन्दा पहिले सत्तारुढ दल स्पष्ट हुनुपर्ने बताउनुभएको छ ।
नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले टेलिफोनमार्फत् प्रतिपक्ष दल एमालेलाई स्थिति प्रस्ट पार्न गरेको आग्रहको जवाफमा ओलीले सत्तारुढ दल पहिलो स्पष्ट हुनुपर्नेमा जोड दिनुभएको हो ।
एमाले प्रचार विभागका उपप्रमुख विष्णु रिजालका अनुसार एमसीसीमा एमालेले निर्णय नगरी भएन भन्दै हिजो साँझ माओवादी केन्द्रका अध्यक्ष प्रचण्डले टेलिफोनमार्फत् आग्रह गर्नुभएको थियो । ‘पुष्पकमल दाहालले फोन गर्दा हाम्रो पार्टीका अध्यक्ष केपी ओलीले स्पष्ट शब्दमा भन्नुभएको छ-तपाईंहरूले पहिले केपी ओलीलाई हटाएपछि पारित गर्छौ भनेर बचन दिनुभएको छ, हटाइसकेपछि ‘४-५ महिनामा पारित गर्छौ’ भनेर लिखित कागज नै गर्नुभएको रहेछ,’ ओलीलाई उद्धृत गर्दै रिजालले जानकारी दिनुभयो, ‘अहिले सत्ता चलाइरहनुभएको छ, प्रतिनिधिसभामा १ सय ६५ सदस्य छन, पहिले आफूले निर्णय गर्नुस, नेकपा एमाले त निर्णय गरिहाल्छ ।’
रिजालका अनुसार सत्तारुढ गठबन्धनमा रहेका माओवादी केन्द्रसहित नेपाली कांग्रेस, जनता समाजवादी पार्टी नेपाल, नेकपा एकीकृत समाजवादी र राष्ट्रिय जनमोर्चाले अमेरिकन सहयोग एमसीसीका बारेमा पहिला धारणा बनाउनुपर्ने एमालेको पूर्ववतः भनाइ कायमै छ ।
