काठमाडौँ । विश्वभर फैलिएको कोरोना भाइरसको नयाँ भेरियन्ट ओमिक्रोनले कोरोनाविरुद्धको खोप नलगाउनेहरूमा जोखिम बढी हुने मात्र नभएर सिकिस्त नै बनाउने चिकित्सकहरूले चेतावनी दिएका छन् ।
खोप नलगाउने व्यक्तिमा तत्काल रोगको सङ्क्रमण हुन सक्ने उनीहरूको दाबी छ । भरतपुर अस्पतालका अध्यक्ष फिजिसियन डा भोजराज अधिकारीले खोप (भ्याक्सिन) नलगाएको समुदायमा कोरोना भाइरस सङ्क्रमणको नयाँ भेरियन्ट ओमिक्रोनको बढी खतरा हुने भएकाले जति सक्दो चाँडो खोप दिनुपर्नेमा जोड दिएका छन् ।
अहिलेसम्मको अध्ययनले खोप लगाएको तर ओमिक्रोनबाट सङ्क्रमित भएका व्यक्तिमा जटिल समस्या अत्यन्त कम देखिएको छ भने खोप नलगाएको व्यक्तिमा यसको जोखिम बढी हुने उनले भनाइ छ । चिकित्सक अधिकारीले भने, ‘कोरोना भाइरस सङ्क्रमणको नयाँ भेरियन्ट ओमिक्रोन समुदायमा छिटोछिटो फैलिएको छ ।’ २४ नोभेम्बरमा दक्षिण अफ्रिकाबाट पत्ता लागेको कोभिडको तेस्रो म्युटेसन भेरियन्ट ओमिक्रोन भएको भन्दै उनले कुनै पनि भाइरस स्वरुप परिवर्तन अथवा म्युटेसन हुँदा यो बढी गम्भीर हुने बताए । कोभिडमा भएका अहिलेसम्मका म्युटेसन हेर्दा तुरुन्त हराउने प्रकृतिको नभइ स्थिर पान्डेमिकको रुपमा बदलिइरहेर दुःख दिइरहन सक्ने देखिएको उनको भनाइ छ ।
ओमिक्रोन सबैभन्दा धेरै म्युटेसन भएर देखिएकाले यसको सर्ने तरिका, गम्भीरता र भ्याक्सिनको प्रभाव फरक हुन सक्ने देखिएको उनले बताए । उनले भने,’अहिलेसम्मको तथ्याङ्कले यो धेरै छिटो फैलन सक्ने, श्वासप्रस्वासको माथिल्लो अङ्ग नाक र स्वाशनलीमा बढी रहने तर फोक्सोको भित्री भागसम्म कम पुग्ने हुनाले गम्भीर निमोनिया कम हुने गर्दछ ।’ यसले गर्दा अस्पताल भर्ना धेरै नहुने तर धेरै जनालाई एकैचोटी सङ्क्रमित गर्न सक्ने देखिएको चिकित्सक अधिकारीको भनाइ छ ।
खोपले समेत कम सुरक्षा दिन सक्ने भन्दै उनले थपे, ‘खोपले काम गर्ने भाइरसको प्रोटिनमा म्युटेसन भएकाले खोपले कम सुरक्षा दिन सक्ने खतरा देखिन्छ ।’ पहिलेको भेरियन्टभन्दा सर्ने अवधि औसत तीन दिन देखिएको बताउँदै उनले भने ‘यो सर्ने समय पहिलेको भेरियन्टभन्दा चाँडो हो ।’
भरतपुर सामुदायिक अस्पतालका फिजिसियन डा. महेन्द्र अग्रहरीले खोप लगाउनेलाई भन्दा नलगाएका व्यक्तिलाई यसले छिटो असर गर्ने बताए । उनका अनुसार ज्वरो आउने, नाकबाट हल्का पानी बग्ने, घाँटी खसखसाउने, सुख्खा खोकी लाग्ने, ज्यान दुख्ने, थाक्ने जस्ता लक्षण यो भेरियन्टमा देखिने गरेको छ । चिकित्सक अग्रहरीले भने, ‘मौसमी फ्लूजस्तो मानेर मानिस परीक्षण नगरी आफ्नो दैनिकी गरिरहे धेरैलाई सार्न सक्छन् ।’ अहिले दैनिक १० प्रतिशतका दरले बिरामी बढ्दै गएको बताउँदै उनले यो रोग छिटो सर्ने भएकाले स्वास्थ्य मापदण्ड पालना गर्नसमेत सबैलाई आग्रह गरे ।
उनका अनुसार पहिलाको जस्तो लक्षण नभएकाले कोभिड नदेखिए पनि पिसिआर नेगेटिभ आउँदैमा ओमिक्रोन होइन भन्न सकिने अवस्था छैन । जिल्लामा हालसम्म ओमिक्रोनको परीक्षण गर्ने प्रयोगशाला नरहेको बताउँदै उनले छिट्टै यस्तो प्रयोगशाला स्थापना गर्न सरकारलाई आग्रह गरेका छन् ।
धेरैभन्दा धेरैलाई खोपको दायरामा ल्याएर जोखिममा रहेकालाई पहिचान गरी उनीहरूलाई बुस्टर डोज दिनसमेत चिकित्सकहरूले आग्रह गरेका छन् ।
भेला, महोत्सव, मेला, सभा सम्मेलन, भौतिक रुपमा विद्यालय र भिडभाड हुने ठाउँलाई स्मार्ट लकाडाउनमार्फत व्यवस्थित गर्न जरुरी रहेको उनीहरूको भनाइ छ ।
परीक्षणलाई सजिलो, दायरा फराकिलो र द्रूत रिपोर्टिङको संयन्त्र बनाउँदै अस्पतालमा तेर्सो लहर सामना गर्न व्यापक तयारी गरी विगतमा भएका कमजोरी सच्याउनुपर्नेमा चिकित्सकहरुको जोड छ ।
