अर्घाखाँची । नेकपा एमालेका सचिव टोपबहादुर रायमाझीले एमाले अध्यक्ष ओलीलाई मदन भण्डारीसँग तुलना गर्नुभएको छ ।
एमाले अर्घाखाँचीको जिल्ला अधिवेशनको उद्घाटन पूर्व उपप्रधानमन्त्रीसमेत रहेका नेता रायमाझीले धेरै व्यक्तिहरूले एमालेको नेतृत्व गरेका भए पनि कि त मदन भण्डारीको चर्चा भएको र कि केपी ओलीको मात्र चर्चा भएको भन्दै केपी ओलीलाई मदन भण्डारीसँग तुलना गर्नुभएको हो ।
‘केपी ओली लामो समय जेल बस्नुभो,’ नेता रामाझीले भन्नुभयो, ‘पछि जेलबाट निस्किए पनि मुल नेतृत्वमा रहनुभएन । तर, चर्चा मदन भण्डारीको छ कि केपी ओलीकै छ ।’
नेता रायमाझीले प्रमुख प्रतिपक्षीका विरुद्ध आमगठबन्धन बन्नु सत्ताधारीको हारको उपज भएको बताउनुभयो । कांग्रेस महाधिवेशनमा समेत ओलीको पक्षमा नाराबाजी भएको भन्दै रायमाझीले एमालेविरुद्ध चौतर्फी घेरावन्दी भए पनि आफूहरू ठिक ठाउँमा रहेको दाबी गर्नुभयो ।
‘सत्तापक्षीय पार्टीको अधिवेशन छ,’ नेता रायमाझीले भन्नुभयो, ‘तर चर्चा ओलीकै हुन्छ, भनेपछि देश एमालेकै वरिपरि घुमिरहेको छ ।’
