काठमाडौं । नेपालमा केही दिनदेखि कोरोना संक्रमणको ग्राफ उकालो लागेको छ । पछिल्लो २४ घण्टामा ५४० जना कोरोना भाइरसका संक्रमित थपिनुले यसलाई पुष्टि गरेको छ ।
स्वास्थ्य तथा जनसंख्या मन्त्रालयका अनुसार ७ हजार २०९ जनाको पीसीआर परीक्षण गर्दा ४७८ जना र ४ हजार ८९० एन्टिजेन परीक्षण गर्दा ६२ जना गरी ५४० जना संक्रमित थपिएका छन् ।
त्यस्तै पछिल्लो २४ घण्टामा कोरोना संक्रमणमुक्त हुनेको संख्या २७१ रहेको छ भने एकजनाको मृत्यु भएको छ । नेपालमा कोरोना सङ्क्रमणमुक्त हुने दर ९७.९ प्रतिशत रहेको जनाइएको छ । नेपालमा हालसम्म कोरोनाबाट ११ हजार ६०२ जनाको मृत्यु भएको छ ।
यसैगरी, देशभर हालसम्म पाँच हजार ४३१ जना सक्रिय सङ्क्रमित रहेको स्वास्थ्य मन्त्रालयले जनाएको छ ।
यस्तै काठमाडौं उपत्यकामा थप ३१० जना कोरोना संक्रमित थपिएका छन् । मन्त्रालयका अनुसार काठमाडौंमा २२१, ललितपुरमा ५९ र भक्तपुरमा ३० जनामा कोरोना संक्रमण पुष्टि भएको छ ।
