चितवन । नेकपा (एमाले)का प्रचार विभाग प्रमुख योगेश भट्टराईले चितवन महाधिवेशनलगत्तै एमाले चुनावको तयारीमा जाने बताउनुभएको छ ।
१०औँ महाधिवेशनको उद्घाटनअघि शुक्रबार बिहान चितवनमा आयोजित पत्रकार सम्मेलनमा भट्टराईले भन्नुभयो, ‘यो हप्ता हामी महाधिवेशनमा छौँ, अर्जुनदृष्टि यसैमा छ । महाधिवेशनपछि ‘जसरी महाभारतमा अर्जुनले दृष्टि लगाए’, त्यसरी एमालेको दृष्टि अब चुनावमा हुन्छ ।’
महाधिवेशनले पार्टीलाई एकताबद्ध बनाउने र आगामी तीन तहकै चुनावमा एमालेले बहुमत हासिल गर्नेगरी महाधिवेशनबाट संकल्प लिइने उहाँले बताउनुभयो ।
महाधिवेशनको विशेष सन्देश रहनेछ । यो महाधिवेशना सहमति र एकताको महाधिवेशन हो । अन्तरविरोधलाई मैत्रीपूर्ण ढंगबाट समाधान गर्दै एमालेलाई यो देशको कम्युनिष्ट आन्दोलनको एकमात्र पार्टीका रूपमा स्थापित गरिनेछ,’ उहाँले भन्नुभयो ।
एमालेले विधान महाधिवेशनबाट आफ्नो नीति, विधान र कार्यदिशा पास गरिसकेको भट्टराईले स्मरण गराउनुभयो ।
‘जनताको बहुदलीय जनवादलाई सुदृढ गर्दै यसको मार्गनिर्देशनमा समाजवादको आधार निर्माण गर्ने एमालेको कार्यदिशा हो,’ उहाँले भन्नुभयो, ‘नेपालका राजनीतिक दलमा यो सबैभन्दा उन्नत र सबैभन्दा समृद्ध कार्यदिशा हो, अब हामी त्यतातिर जान्छौँ । महाधिवेशनबाट सबै प्रतिनिधिलाई कार्यदिशाबारे बुझाउनेछौँ,’ उहाँले भन्नुभयो ।
