काटमाठौं । प्रमुख प्रतिपक्षी दल नेकपा एमालेका प्रवक्ता प्रदीप ज्ञवालीले विधान महाधिवेशनबाट पारित एमाले बिधानमा अब संशोधन नहुने बताउनुभएको छ ।
नेकपा एमालेको १०औंं महाधिवेशन तयारीका बिषयमा प्रेस चौतारी उपत्यका प्रदेश कमिटीले आइतबार आयोजना गरेको अन्तरक्रियामा बोल्दै एमाले सचिवसमेत रहेका प्रवक्ता ज्ञवालीले विधान संशोधन गर्न सकिने भए पनि नेतृत्व चयन गर्ने महाधिवेशनबाट यो कार्य नहुने प्रष्ट पार्नुभयो ।
‘पहिलो विधान महाधिवेशनमा सुविचारित रूपमै पदाधिकारी संख्या कायम गरिएको छ, एमाले जस्तो पार्टीमा १५ जना पदाधिकारी राख्ने कुरा निकै चुनौतीपूर्ण नै हो सयभन्दा बढी पदाधिकारी हुन योग्यतम साथीहरू हुनुहुन्छ, तर हामी त्यही १५ भित्रै योग्यतम नेतृत्व चयन गर्ने भनेर नै विधानमा व्यवस्था गरिएको हो’, उहाँले भन्नुभयो, ‘महाधिवेशनले विधान संशोधन गर्न सक्ने भए पनि अहिले त्यसतर्फ एमाले जाँदैन, यसैमा मिलाउँछ ।’
ज्ञवालीले दशौं महाधिवेशनपछि एमाले राष्ट्रिय स्वधीनता, राजनीतिक स्थिरता र समृद्धिको संकल्प लिएर सशक्त रूपमा अघि बढ्ने बताउनुभयो ।
उहाँले महाधिवेशमा सहमतिको आधारमा नेतृत्व चयन गर्ने अधिकतम प्रयत्न हुने जानकारी दिँदै भन्नुभयो, ‘सहमतिका आधारमा नेतृत्व चयन गर्ने अधिकतम कोसिस हुन्छ, सम्भव भएन भने पनि उच्चतम समझदारी कायम हुनेछ ।’
