Margadarsan


  • बिनाविभागीय मन्त्रीमा डोबाटेले शपथ लिएसँगै गण्डकीको गठबन्धनमा चुलियो असन्तुष्टि

    माओवादीलगायत सत्ता गठबन्धन र विपक्षी सांसदहरू शपथ ग्रहण कार्यक्रममा सहभागी भएनन्

    मार्गदर्शन २५ आश्विन २०७८, सोमबार

    पोखरा । गण्डकी प्रदेशका बिनाविभागीय मन्त्री डोबाटे विश्वकर्माले मन्त्रीको शपथ लिनुभएको छ । सोमबार साँझ प्रदेश प्रमुख पृथ्वीमान गुरुङले उहाँलाई पद तथा गोपनीयताको शपथ गराउनुभएको हो । मुख्यमन्त्री कृष्णचन्द्र नेपाली पोखरेलले चौतर्फी विरोध भएपछि डोबाटेलाई मन्त्रीमा नियुक्त गर्नुभएको हो ।

    ८ साउनमा नै उहाँ मन्त्री बन्ने लगभग पक्का थियो तर अन्तिम समयमा उहाँको नाम काटियो । मन्त्रीमा नियुक्त भएपछि उहाँले संविधानअनुसार पाएको जिम्मेवारी पूरा गर्ने प्रतिबद्धता जनाउनुभयो ।

    मन्त्री नियुक्तिमा सल्लाह नगरेको भन्दै गठबन्धनका नेताहरू भने असन्तुष्ट बनेका छन् । ‘मिचेर गएको महसुस भयो । यसरी नै जाने हो भने गठबन्धन के हुन्छ, के हुन्छ’, माओवादी केन्द्रका संसदीय दलका नेता हरिबहादुर चुमानले भन्नुभयो, ‘हामी मुख्य दल, हामीलाई नै थाहा छैन । अरूलाई झन् के थाहा भयो होला र ?’

    उहाँले मन्त्री बन्ने होहल्ला सुनेपछि मुख्यमन्त्रीलाई अहिले शपथ नगराउन आग्रह गरे पनि नमानेको गुनासो सुनाउनुभयो । ‘माथिकै सहमतिमा गरेको भन्नुहुन्छ । माथि सल्लाह भएको भए हामीलाई खबर आउनुपर्ने हो’, उहाँले थप्नुभयो, ‘अब कसरी जाने भन्ने छलफल गरौँला । यसमा हाम्रो असहमति छ ।’

    माओवादीलगायत सत्ता गठबन्धन र विपक्षी सांसदहरू समेत शपथ ग्रहण कार्यक्रममा सहभागी थिएनन् । अर्को सत्ता साझेदार दल जनता समाजवादीका नेता तथा ऊर्जामन्त्री हरिशरण आचार्यले बाटो बिराएको भन्दै त्यसो नगर्न सरकारलाई चेतावनी दिनुभएको छ ।

    ‘कांग्रेसले एकपछि अर्को सहमति तोड्दै बेइमान बन्दै गएको छ । स्वेच्छाचारी बन्दै गएको छ’, उहाँले भने, ‘हामीसँग गरेको सहमति तोडेर अन्यत्रैबाट मन्त्री नियुक्त गर्नु गलत हो । बाटो बिराउँदा राम्रो परिणाम निस्किँदैन ।’

    यस प्रदेशमा अब कांग्रेसका छ, माओवादी केन्द्रका चार, जसपाका एक र अर्का एक जना स्वतन्त्र सांसद मन्त्री बनेका छन् ।

    फेसबुक प्रतिक्रिया