काठमाडौं । सर्वोच्च अदालतले हत्याका आरोपी सभामुख अग्नि सापकोटाविरुद्ध मुद्दा ‘हेर्न नमिल्ने’मा राखेको छ । आज बसेको संवैधानिक इजलासले सापकोटाको मुद्दालाई हेर्न नमिल्नेमा राखेको हो ।
सो इजलासमा प्रधानन्यायाधीश चोलेन्द्रशम्शेर जबरा, न्यायाधीश दीपककुमार कार्की, मीरा खड्का, हरिकृष्ण कार्की र ईश्वरप्रसाद खतिवडा रहनुभएको छ । २०७६ फागुन ३० गते सभामुख सपकोटाविरुद्धको मुद्दा पेशीमा चढेको थियो तर मुद्दा हेर्न नभ्याएपछि सुनुवाइ सर्दै आएको थियो ।
सशस्त्र द्वन्द्वकालमा काभ्रेका अर्जुन लामाको हत्यामा संलग्न भएको आरोपमा सापकोटाविरुद्ध सर्वोच्चमा मुद्दा परेको थियो ।
२०६२ वैशाख १६ गते श्रीकृष्ण मावि दाप्चामा अभिभावक भेला स्थलबाट लामा अपहरणमा पर्नुभएको थियो भने साउन तेस्रो साता लामालाई जिउँदै खाल्डोमा पुरेको भन्दै उहाँकी पत्नी पूर्णिमायाले २०६४ सालमा जाहेरी दिनुभएको थियो । पूर्णिमायाको जाहेरी प्रहरी नलिएपछि उहाँले सर्वोच्चमा मुद्दा दायर गर्नुभएको थियो ।
सर्वोच्चले २०६४ फागुन २२ गते आदेश दिएपछि जाहेरी दर्ता भएको थियो । तर, बाबुराम भट्टराई नेतृत्वको सरकारले सापकोटाविरुद्धको जाहेरी तामेलीमा राख्ने निर्णय गरेको थियो । यस निर्णयविरुद्ध लामाकी पत्नी फेरि सर्वोच्च अदालत जानुभएको थियो । तर सर्वोच्चले निर्णय कार्यान्वयन नगर्न आन्तरिम आदेश दिएको थियो । सर्वोच्चको संवैधानिक इजलासमा विचाराधीन सोही मुद्दामाथि सर्वोच्चको संवैधानिक इजलासमा सुनुवाइ भइरहेको छ ।
