काठमाडौं । प्रमुख प्रतिपक्षी दल नेकपा एमालेले सभामुख अग्नि सापकोटा र निर्वाचन आयोगविरूद्ध सर्वोच्च अदालतमा दर्ता गरेको छ ।
बुधबार तीनवटा रिट लिएर सर्वोच्च अदालत पुगेका एमाले संसदीय दलका प्रमुख सचेतक विशाल भट्टराईका अनुसार निर्वाचन आयोग, सभामुख अग्नि सापकोटा र लुम्बिनी प्रदेशका सभामुख पूर्णबहादुर घर्तीविरुद्ध मुद्दा हालिएको छ । । एमाले अध्यक्ष केपी शर्मा ओलीका तर्फबाट सुमित्रा पाण्डेले सर्वोच्च अदालतमा दायर गरेको रिटमा एमालेबाट निष्कासनमा परिसकेका १४ जना सांसद र ९ जना केन्द्रीय सदस्यलाई सनाखत गराएर भएको नेकपा एकीकृत समाजवादी दर्ता बदर माग गरिएको छ ।
एमालेले निर्वाचन आयोगले बदनियतपूर्ण र अनाधिकृत व्यक्तिहरुलाई हस्ताक्षर गरेर एमाले फुटाउन गरेको हस्ताक्षरलाई मान्यता दिएको आरोप लगाएको छ । रिटमा झलनाथ खनालसहित १४ जना सांसदले वैशाख २७ गते आफ्नै प्रधानमन्त्रीलाई विश्वासको मत दिने बेला ह्वीप उल्लंघन गरी अनुपस्थित भएको आधारमा निष्कासन गरिएकोले उनीहरूलाई सांसद पदबाट पदमुक्त गर्नसमेत माग गरिएको छ ।
सभामुख अग्नि सापकोटाविरुद्ध भने एमालेले कारबाही गरेका सांसदहरुको सूचना नटाँसेको आरोप लगाइएको छ । रिटमा नेकपा (एकीकृत समाजवादी) पार्टी खोलेका माधवकुमार नेपालसहित १४ सांसदलाई पनि विपक्षी बनाएको छ ।
त्यस्तै लुम्बिनी प्रदेशका सभामुखले पनि प्रदेश सांसदहरुलाई कारवाही गरेको सूचना नटाँसेकाले रिट निवेदन दर्ता गर्नुपरेको एमालेले बताएको छ ।