काठमाडौं । प्रमुख प्रतिपक्षी दल नेकपा एमालेको स्थायी कमिटी बैठक बस्ने भएको छ । एमाले प्रवक्ता प्रदीप ज्ञवालीका अनुसार पछिल्ला राजनीतिक घटनाक्रमको समीक्षा र आगामी रणनीतिबारे छलफल गर्न बैठक आह्वान गरिएको हो ।
माधव नेपालको साथ छाडेका मध्यमार्गी धारका नेताहरूसँगको छलफलपछि मंगलबार स्थायी कमिटी बैठक बस्न लागेको हो । भोलिको बैठकमा १० बुँदे सहमति कार्यान्वयनको प्रक्रियामा लैजाने बिषयमा छलफल हुने बताइएको छ ।
यसअघि आज माधव नेपालको नयाँ दलविरुद्ध उभिएका नेताहरु अध्यक्ष केपी शर्मा ओलीलाई भेट्न बालकोट पुग्नुभएको थियो ।
एमाले उपाध्यक्ष भीम रावल र युवराज ज्ञवाली, उपमहासचिव घनश्याम भूसाल, सचिव गोकर्ण विष्ट र योगेश भट्टराई, स्थायी कमिटी सदस्य सुरेन्द्र पाण्डे, रघुजी पन्तलगायतका नेताहरु बालकोट पुग्नुभएको छ । उहाँहरुले १० बुँदे सहमति कार्यान्वयन गर्न अध्यक्ष ओलीलाई आग्रह गर्नुभएको थियो ।
माधव नेपाल छाडेका ५७ जना नेताहरुले अध्यक्ष ओलीलाई १० बुँदे कार्यान्वयन गर्न र नेता नेपाललाई नयाँ दल दर्ताबाट पछि हट्न सुझाव दिँदै आउनुभएको छ ।
‘निरन्तरको प्रयासले उहाँहरु बालकोट पुग्नुभएको हो,’ एमाले स्थायी कमिटीका सदस्य सुवासचन्द्र नेम्वाङले भन्नुभयो, ‘पार्टीले अनुमोदन गरिसकेको १० बुँदे कार्यान्वयनमा लैजादा पार्टीभित्र सहमति कायम हुन्छ । त्यसमा अध्यक्ष सकारात्मक हुनुहुन्छ ।’ एमाले केन्द्रीय कमिटी बैठकले १० बुँदे सहमति अनुमोदन गरिसकेकाले अब कार्यान्वयनमा कुनै समस्या नरहेको एमाले नेताहरुले बताउँदै आउनुभएको छ ।