काठमाडौं । एमाले पार्टीमा गद्दार गरी विपक्षीलाई सघाउने माधव नेपाल समूहको आजको निर्णयलाई हेरेर भावी रणनीति तय गर्न नेकपा एमालेले भोलिका लागि स्थायी कमिटी बैठक बोलाएको छ ।
भोलिको बैठकमा सातै प्रदेशका अध्यक्षहरुलाई समेत डाकिएको छ । पार्टीको दशौं महाधिवेशन र विधान संसोधनका बारेमा छलफल गर्न आफूहरुलाई समेत बैठकमा डाकिएको एमाले प्रदेश २ का अध्यक्ष ज्वालाकुमारी साहले बताउनुभयो ।
नेपाल समूहले आजको बैठकपछि नयाँ पार्टी दर्ता गर्ने एमाले संस्थापनको अनुमान छ । पार्टीमा सहमति कायम गर्नका लागि लामो समयदेखि लागिपरिरहेका एक नेताका अनुसार अब पार्टी बनिनेभन्दा पनि भत्किने बाटोतिर गएको छ । ‘पार्टी बचाउनलाई धेरै प्रयत्न गरियो तर अब भत्केला जस्तो छ,’ निराश हुँदै ती नेताले भन्नुभयो, ‘अब भोलि बस्ने स्थायी कमिटीको बैठकले धेरै कुराहरुको छिनोफानो गर्दछ ।’