काठमाडौँ । मंगलबारबाट राष्ट्रिय प्रसारण प्रणालीमा माथिल्लो तामाकोशी जलविद्युत् आयोजना जोडिएको छ । दोलखाको विगू गाउँपालिका–१ लामाबगरमा निर्माण भएको ४५६ मेगावाट क्षमताको आयोजनाको दोस्रो युनिटको ७६ मेगावाट विद्युत् मंगलबार दिउँसोबाट राष्ट्रिय प्रसारण प्रणालीमा जोडिएको हो ।
साथै माथिल्लो तामाकोशी जलविद्युत् आयोजनाको दोस्रो युनिटबाट विद्युत् उत्पादान सुरु समेत भएको छ । दोस्रो युनिट प्रणालीमा जोडिएपछि आयोजनाबाट १५२ मेगावाट विद्युत् उत्पादन भइरहेको प्रवर्धक अपर तामाकोशी हाइड्रो पावर कम्पनीका प्रमुख कार्यकारी अधिकृत विज्ञानप्रसाद श्रेष्ठले जानकारी दिनुभयो । उहाँका अनुसार अब हरेक १५ दिनमा अर्को युनिटबाट बाँकी ४ वटा युनिट क्रमशः उत्पादन गर्दै जाने योजना छ ।
“असारभित्रै दोस्रो युनिट सञ्चालन गर्ने योजनाअनुरुप नै आज थप ७६ मेगावाट विद्युत् प्रणालीमा जोडेका छौं,” उहाँले भन्नुभयो “अबको २ सातामा तेस्रो युनिट पनि जोडिन्छ ।” आगामी भदौ महिनाभित्र ६ वटै युनिट सञ्चालनमा आउने जानकारी उहाँले गराउनुभयो ।
आयोजनाको विद्युत्गृहमा रहेका ६ वटा युनिटको प्रतिगोटा क्षमता ७६ मेगावाट छ । गत साता असार २१ गते तामाकोशीको पहिलो युनिटबाट उत्पादन सुरु गरिएको थियो । पहिलो सञ्चालनका लागि निवर्तमान प्रधानमन्त्री केपी शर्मा ओलीले बालुवाटारबाटै उद्घाटन गर्नुभएको थियो । उत्पादन गरेको विद्युत् गोंगरस्थित विद्युत्गृहदेखि ४७ किलोमिटर लामो २२० केभी डबल सर्किट प्रसारण लाइनबाट न्यू खिम्ती सबस्टेसन पु-याइएको छ । त्यहाँबाट खिम्ती–ढल्केबर प्रसारण लाइनबाट ढल्केबरस्थित ४००(२२० केभी) सवस्टेसनमा पु-याइएको छ । न्यू खिम्ती सवस्टेशनमा माथिल्लो तामाकोसीसँगै ५४ मेगावाटको लिखु खोलाको विद्युत्समेत जोडिएको छ । न्यू खिम्ती सवस्टेशन समेत माथिल्लो तामाकोसी जलविद्युत् आयोजनाले नै निर्माण गरेको हो ।
आयोजनाले सबैभन्दा सुख्खा समयमा दैनिक कम्तीमा ४ घन्टा पूर्ण क्षमता (४५६ मेगावाट) उत्पादन गर्नेछ । रोल्वालिङ खोलाको पानी मिसाएर उत्पादन बढाउने योजना पनि कार्यान्वयन भइरहेको छ । रोल्वालिङको पानी मिसाउँदा थप २२ करोड युनिट र थप २० मेगावाटबाट १० करोड युनिट विद्युत् थप हुनेछ । रोल्वालिङ आयोजनाको पनि डीपीआर गरेर बोलपत्र आह्वानको प्रक्रियामा गएको छ । यो आयोजनाबाट वार्षिक औसत २ अर्ब २८ करोड १० लाख युनिट विद्युत् उत्पादन हुने बताइएको छ ।