बसको ठक्करबाट छात्राको मृत्यु, चाबहिल क्षेत्र तनावग्रस्त

काठमाडौं । सुकेधारामा बसको ठक्करबाट एक छात्राको मृत्यु भएको छ । भक्तपुर–काठमाडौँ चल्ने बा ४ ख ५९२० नम्बरको बसको ठक्करबाट आज विहान पशुपति क्याम्पस चाबहिलमा बीबीएस चौथो वर्षमा अध्ययनरत विद्यार्थी २१ वर्षीया सृष्टि पन्तको मृत्यु भएको हो ।
गोरखा घर भएकी २१ वर्षीया पन्तलाई सडक पार गर्ने क्रममा बसले ठक्कर दिएको प्रत्यक्षदर्सीहरुले बताएका छन् । बसको ठक्करबाट घाइते पन्तको ओम अस्पतालमा उपचारका क्रममा निधन भएको बताइएको छ ।
सहपाठीको मृत्युपछि सो क्याम्पसका विद्यार्थीहरु सडकमा विरोध प्रदर्शन गरिरहेका छन् । आक्रोसित विद्यार्थीले बा४ख ७१०१ नम्बरको बसमा आगजनी गरेका छन् भने बा३ख ४४३३ नम्बरको बस तोडफोड गरेका छन् । विद्यार्थीको प्रदर्शनबाट सुकेधारा–चाबहिल क्षेत्रमा अहिले तनावग्रस्त भएको छ । प्रहरीले आगजनीमा संलग्न केही विद्यार्थीलाई नियन्त्रणमा लिएको छ ।