प्रधानमन्त्री केपी शर्मा ओलीले मेलम्ची खानेपानी आयोजनाको काम तिव्र गतिमा भइरहेको बताएका छन् । बालकुमारी फोहोरपानी प्रशोधन केन्द्रको बिहीबार शिलान्यास गर्दै प्रधानमन्त्री ओलीले मेलम्ची खानेपानी योजनाको काम चिल्लो सडकमा जापानी कार दौडिएजस्तो अगाढि बढिरहेको बताए ।
प्रधानमन्त्री ओले भने, ‘२७ वर्ष चिप्लेकिरा जस्तै हिँड्यो । अब यो वर्ष त्यसरी हिँड्न पाएको छैन । जापानी कार चिल्लो बाटोमा हिँडेजस्तो हिडेको छ ।’ उनले इटालीयन कम्पनीले काम छाडेर हिँडे पनि आयोजना तीब्र गतिमा अघि बढिरहेको दावी गरे ।
मेलम्ची आयोजना निर्माणको काम इटालीयन कम्पनी सीएमसीले नै गर्ने बताउँदै उनले भने, ‘कम्पनीको प्रतिष्ठाको कुरा छ, काम हुन्छ भन्नेमा विस्वस्त छु ।’ प्रधामन्त्री ओलीले सरकारले जुनसुकै अवस्थामा पनि काम अगाडि बढाउने बताउँदै समयभित्र काम सक्ने दावी गरेका छन् ।
ललितपुरको बालकुमारीमा २ वर्ष ६ महिनामा निर्माण सम्पन्न हुने लक्ष्य रहेको फोहर पानी प्रशोधन केन्द्रको निर्माण लागत ६० करोड ७५ लाख रुपियाँ रहेको छ ।
प्रशोधन केन्द्रले दैनिक १ करोड ७५ लाख लिटर फोहोर पानी प्रशोधन गर्नेछ ।