काठमाडौं, प्रधानमन्त्री केपी शर्मा ओलीले हरेक दिन मुलुक एक कदम अघि बढ्नुपर्ने बताउनुभएको छ ।
आर्थिक वर्ष २०७५÷०७६ को स्वीकृत कार्यक्रम एवं बजेटको कार्यान्वयनसम्बन्धी प्रथम चौमासिक समिक्षा बैठकको दोस्रो दिन आज सिंहदरबारमा सम्बोधन गर्दै प्रधानमन्त्री ओलीले सो कुरा बताउनुभएको हो ।
प्रधानमन्त्री ओलीले सबै क्षेत्र हरेक दिन रचनात्मक कामसहित एक कदम अघि बढ्नुपर्ने बताउनुभएको छ । ‘हरेक दिन हरेक क्षेत्रमा रचनात्मक र नयाँ काम हुुनु पर्दछ । त्यो काम एक कदम अगाडि बढ्ने हुनु पर्दछ’ प्रधानमन्त्री ओलीले भन्नुभयो, ‘सबै क्षेत्र रचनात्मक भएर अघि बढ्ने हो भने नेपाल हरेक दिन एक कदम अघि बढ्छ ।’
मन्त्री र कर्मचारीहरुले काम गर्ने ढाँचामा पनि परिवर्तन गर्नु पर्ने प्रधानमन्त्री ओलीको भनाइ छ । नीति,बैठक,छलफल,सुझावमा धेरै समय नविताइ काममा प्राथमिकता दिन प्रधानमन्त्री ओलीले निर्देशन दिनुभएको छ । ‘आफैं गहन अध्ययन गर्नुहेस । अवधारणा बनाउनुहोस । त्यसपछि सुझाव लिनुहोस्’ प्रधानमन्त्री ओलीले भन्नुभयो ‘सबै कुरा विज्ञबाट ग्रहण गरेर तपाईंले गर्न खोजेको काम पूर्ण हँुदैन । आफू स्पष्ट हुनुहोस् । विज्ञको सुझावले त्यसलाई समृद्ध बनाउनुहोस ।’
कार्यलय समयमा हुने बैठकको भत्ता नलिन प्रधानमन्त्री ओलीले कर्मचारीलाई निर्देशन दिनुभएको छ । ‘कार्यलय समयमा गरेको कामको तपाईंले तलब लिनु भएको छ । त्यस कारण भत्ता लिने सोचाइ हटाउनुहोस । मितव्ययी भएर चल्न सिक्नुहोस्’ प्रधानमन्त्री ओलीले भन्नुभयो ।
प्रधानमन्त्री ओलीले नेपाल एयर लाइन्सको वाइवडी जहाज उडाउने तयारी छ कि छैन भनी प्रश्न गर्नुभएको छ । त्यसैगरी नेपाल वायु सेवा निगम घाटामा जानुको कारण बारे पनि प्रधानमन्त्री ओलीले चासो राख्नु भएको छ ।
प्रधानमन्त्री ओलीले वन मन्त्रालयलाई वृक्षरोपणमा मात्र होइन कृषि वन बढाउन आग्रह गर्नुभएको छ । “अनुपत्पादक जातको वृक्षारोपण होइन । उत्पादन दिने खालका फलफूलका विरुवा रोप्न प्रेरित गर्नुहोस” प्रधानमन्त्री ओलीले भन्नुभयो ‘यस्तो गरेमा फलजति जनताको बोटजति सरकारको हुन्छ ।’
सहकारीहरु मार्फत ठूलो मात्रामा कृषि उत्पादन गर्न सकिने विभिन्न देशको दृष्टान्त दिँदै प्रधानमन्त्री ओलीले त्यसै अनुसार नेपालमा पनि वृहत उत्पादनमा जोड दिनु पर्ने बताउनुभएको छ । “वृहत मात्रामा कृषि उत्पादन गरौं । जसलाई निर्यात गर्न पनि सजिलो हुन्छ ” प्रधानमन्त्री ओलीले भन्नुभयो “अहिलेको हाम्रो न्यून उत्पादनले गर्दा बजारमा पु¥याँउदा खर्च पनि नधान्ने स्थिती सृजना भएको हो । ”
प्रधानमन्त्री ओलीले कृषि,उद्योग,पर्यटन,सेवाका क्षेत्रलाई आधुनिकिकरण गरेर रोजगारी सृजना गर्नु पर्ने बताउनुभएको छ । प्रधानमन्त्री ओलीले संघ,प्रदेश र स्थानीय तहमा भएको समन्वयको अभावलाई घटाउनु पर्ने बताउनुभएको छ । “यस्ता कुराले कतिपय ठाउँमा कार्यक्रम,योजना र बजेट दोहोरो पर्ने स्थिती छ । त्यस्ता कुरालाई हटाउनु पर्दछ ” प्रधानमन्त्री ओलीले भन्नुभयो ।
आजको समिक्षा बैठकमा खानेपानी तथा सरसफाइ मन्त्रालयका सचिव गजेन्द्र ठाकुर,युवा तथा खेलकुद मन्त्रालयका सचिव मोहनकृष्ण सापकोटा,शिक्षा,विज्ञान तथा प्रविधि मन्त्रालयका सचिवहरु खगराज बराल र कृष्ण विसीले आफ्नो आफ्नो मन्त्रालयको प्रगति विवरण पेश गर्नुभएको थियो ।
यसैगरी भूमि व्यवस्था तथा सहकारी मन्त्रालयका सचिव गोपीनाथ मैनाली,श्रम रोजगार तथा सामाजिक सुरक्षा मन्त्तालयका सचिव महेश दाहाल,वन तथा वातावरण मन्त्रालयका सचिव विश्वनाथ ओली र संस्कृति,पर्यटन तथा नागरिक उड्ययन मन्त्रालयका सचिव कृष्ण प्रसाद देवकोटाले प्रगति विरण पेश गर्नुभएको थियो । बाँकी मन्त्रालयहरुको प्रगति समिक्षा बैठक आगामी शनिवार हुनेछ ।