अन्नपूर्ण आधार शिविरदेखि घान्द्रुकसम्म म्याराथन

अन्नपूर्ण सेन्चुरी पर्यटन महोत्सवको तेस्रो चरणको कार्यक्रमअन्तर्गत हुन लागेको म्याराथनमा राष्ट्रिय धावकसहित ५८ जनाको सहभागिता हुनेछ ।

उक्त महोत्सव मूल व्यवस्थापन समितिका संयोजक ललित गुरुङका अनुसार म्याराथनमा सहभागी हुन काठमाडौँलगायत देशका अन्य भागबाट आएका धावकलाई मंगलबार नै पोखरामा एक कार्यक्रमका बीच अन्नपूर्ण आधार शिविरतर्फ बिदाइ गरिएको थियो ।

“प्रत्येक वर्षको जुन ३ मा मनाइने ‘अन्नपूर्ण डे’ को अवसर पारेर खेल पर्यटनको विकास र विस्तार गर्ने उद्देश्यसहित अन्नपूर्ण पदयात्रा मार्गमा म्याराथन हुन लागेको हो”, उहाँले भन्नुभयो, “जेठ २० गते विहान ६ः३० बजे चार हजार १०० मिटर उचाइको अन्नपूर्ण आधार शिविरबाट शुरु भएर एक हजार ६९० मिटर उचाइमा रहेको घान्द्रुकमा आएर म्याराथन समापन हुनेछ ।”

धावकहरूले ४२.१९५ किमी दूरी पूरा गर्ने महोत्सव प्रचारप्रसार समितिका संयोजक टंकराज अधिकारीले जानकारी दिनुभयो ।

अन्नपूर्ण आधार शिविरतर्फ लागेका धावकहरू मंगलबार घान्द्रुक पुगी आज बुधबार छोम्रोङ, बिहीबार हिमालय हुँदै १८ गते शुक्रबार अन्नपूर्ण आधार शिविर पुग्ने र २० गते आइतबार उनीहरू म्याराथनमा सहभागी हुनेछन् ।

म्याराथन अन्नपूर्ण आधार शिविरबाट शुरु भई माछापुच्छ«्रे आधार शिविर हुँदै देउराली, हिमालय, दोभान, वाम्वो, सिनुवा, छोम्रोङ, घुर्जुङ, टाढापानी, भौसी खर्क हुँदै घान्दुकमा आई सम्पन्न हुनेछ ।

अन्नपूर्ण म्याराथनका प्रमुख निर्णायक एवं राष्ट्रिय खेलकूद परिषद्का एथ्लेटिक्स विभागका प्रमुख प्रशिक्षक कृष्ण बस्नेतका अनुसार प्रतियोगितामा नेपालका चर्चित धावकहरू नेपाली सेनाका हरि रिमाल, होमलाल श्रेष्ठ, पूर्ण तामाङ, शेखराज चौलागार्इं, नेपाल प्रहरीका भूमिराज राई र भारतीय सेनाका धनबहादुर घर्ती मगरले समेत भाग लिँदैछन् ।

“म्याराथनका लागि नौजना निर्णायकहरू परिचालन गरिनेछ”, उहाँले भन्नुभयो, “म्याराथनको रुटमा आवश्यक पर्ने स्वयंसेवक, स्वास्थ्यकर्मी, आवश्यक उपकरण एवं अन्य व्यवस्थापन पूरा भएको छ ।”
जुन ३ तारिखका दिन फ्रान्सेली नागरिक मौरिस हर्जोगको टोलीले अन्नपूर्ण प्रथम हिमालको सफल आरोहण गरी विश्वकीर्तिमान राखेको दिनलाई अन्नपूर्ण दिवसका रुपमा मनाइँदै आइएको यही सन्दर्भ पारी म्याराथन आयोजना गरिएको आयोजकले जनाएको छ ।
प्रचार संयोजक अधिकारीका अनुसार म्याराथनमा प्रथम हुने धावकले रु एक लाख, दोस्रोले रु ७० हजार, तेस्रोले ५० हजार नगद पुरस्कार पाउने र उत्कृष्ट १० जनाभित्र पर्ने धावकले सान्त्वना पुरस्कार पाउने छन् ।

महोत्सवको तेस्रो चरणअन्तर्गत जेठ १७ देखि २० गतेसम्म हुने कार्यक्रमको सम्पूर्ण तयारी पूरा भएको महोत्सवका प्रमुख सल्लाहकार यमनाथ सापकोटाले जानकारी दिनुभयो ।

गत असोज २५ गते अन्नपूर्ण आधार शिविरबाट आरम्भ भएको महोत्सवको दोस्रो चरण गत पुस १० देखि १५ गतेसम्म विविध खेलकूद एवं सांस्कृतिक कार्यक्रमका साथ छोम्रोङमा सम्पन्न भएको थियो ।

अन्नपूर्ण सेन्चुरी पर्यटन महोत्सवकै अवसरमा अन्नपूर्ण आधार शिविरमा पहिलो अन्नपूर्ण हिमाल आरोही मौरिस हर्जोगको शालिक निर्माण गरिने भएको आयोजकले जनाएको छ ।
वासुदेव पौडेल