राष्ट्रिय प्रजातन्त्र पार्टीका अध्यक्ष कमल थापाले आगामी मंसिरमा हुने प्रतिनिधि सभा र प्रदेश सभाको चुनावमा दलहरुबीच हुने धु्रवीकरणले राष्ट्रवादी शक्ति एकताबद्व हुने बताउनुभएको छ ।
पार्टीले आज यहाँ आयोजना गरेको कार्यक्रममा अध्यक्ष थापाले मुलुकमा बढ्दै गएको वैदेशिक हस्तक्षेपलाई दलहरुको धु्रवीकरणले न्यूनीकरण गर्ने र राष्ट्रियताको संरक्षण हुने बताउनुभयो ।
आफ्नो दलले पनि वैचारिक दृष्टिकोणले निकट रहेका अन्य दलसँग सहकार्य र तालमेल गरी चुनावमा सहभागी हुने उहाँको भनाइ थियो ।
अध्यक्ष थापाले मुलुकमा हिन्दू राष्ट्र कायम गर्नका लागि मंसिरमा हुने दुवै चुनावमा जनमत संग्रहको व्यवस्थाको माग गर्नुभयो ।
यही असोज २३ गते काठमाडौँ उपत्यकामा पार्टीले हिन्दू राष्ट्रको पक्षमा विभिन्न कार्यक्रम गर्ने उहाँले जानकारी दिनुभयो ।
–––