नवनियुक्त महिला, बालबालिका तथा समाज कल्याणमन्त्री आशा खनाल कोइरालाले महिलामाथि हुने आपराधिक कार्य नियन्त्रण गर्नु आफ्नो पहिलो काम हुने बताउनुभएको छ ।
मन्त्रालयमा आज साँझ पदबहाली गर्दै उहाँले एक सय दिनभित्र नै जनतालाई महसुस हुने गरी काम गर्ने प्रतिवद्धता व्यक्त गर्नुभयो ।
विद्यालय अध्ययन गर्दादेखि नै राजनीतिक जीवन शुरु गर्नुभएका उहाँले विसं २०५० देखि २०५८ सम्म जेल जीवन बिताउनुभएको थियो ।
नेकपा माओवादी केन्द्रका पोलिटब्युरो सदस्य रहेका कोइराला तनहुँमा जन्मिनुभएको हो । बिएडसम्मको औपचारिक शिक्षा हासिल गर्नुभएको उहाँले स्थायी शिक्षकको जागिर छाड्नु भएको थियो ।
