चितवन । गर्मी मौसमसँगै अण्डाको उत्पादन घट्दा मूल्य बढेको छ । नेपाल लेयर्स कुखुरापालक संघले आइतबार अण्डाको समर्थन मूल्य बढाएको हो । संघका अनुसार, ठूलो अण्डा ५१५ रुपैयाँ प्रतिक्रेट (३० वटा) र मध्यमको ४८५ रुपैयाँ फार्मदर कायम गरिएको छ ।
संघका सचिव मदन पोखरेलका अनुसार, उपभोक्ता मूल्य प्रतिगोटा २५ रुपैयाँ कायम गरिएको छ । यसअघि ठूलो अण्डा ४८५ रुपैयाँ र मध्यम अण्डा ४३५ रुपैयाँ कायम गरिएको उनले बताए ।
नेपाल लेयर्स कुखुरापालक संघका अध्यक्ष विनोद पोखरेलले दुईदिने बिदाले पर्यटक बढ्दा खपत बढ्नुका साथै गर्मीका कारण अण्डा उत्पादन घटेकाले माग बढ्न गई मूल्य बढेको बताए । उनले भने, “किसान कुखुरापालन पेसाबाट पलायन हुँदा जनशक्तिको अभाव छ । कुखुरामा विभिन्न रोग लागेर मरेका छन्, जसले अण्डाको उत्पादन घटेको छ ।”
अण्डाको लागत मूल्य प्रतिगोटा १९ रुपैयाँ १२ पैसा पर्ने जनाउँदै अध्यक्ष पोखरेलले किसानले अझै लागत मूल्य पाउन नसकेका बताए । अण्डा उत्पादन गर्दै आएका विभिन्न कृषि फार्मले जारी गरेको मूल्यको आधारमा नेपाल लेयर्स कुखुरापालक संघले समर्थन मूल्य जारी गर्दै आएको उनले जानकारी दिए ।
फार्महरूको मूल्यलाई समायोजन गरेर समर्थन मूल्य जारी गरिएको अध्यक्ष पोखरेलले जानकारी दिए । उनका अनुसार, दाउन्ने एग्रो फार्म नवलपरासीको ठूलो अण्डा प्रतिपेटी तीन हजार ९५० रुपैयाँ र मझौला तीन हजार ७५० रुपैयाँ, हिमचुली पोल्ट्री नवलपरासीको ठूलो अण्डा तीन हजार ९६० रुपैयाँ र मझौता तीन हजार ७६० रुपैयाँ कायम गरिएको छ । खिलुंग एग्रो स्याङ्जाको ठूलो अण्डा प्रतिपेटी तीन हजार ९७० रुपैयाँ, मझौता तीन हजार ७७०रुपैयाँ, जनकपुर एग्रो जनकपुरको ठूलो अण्डा प्रतिपेटी तीन हजार ९८० रुपैयाँ, मझौता तीन हजार ७८५ रुपैयाँ, पूर्वाञ्चल पोल्ट्र विराटनगरको ठूलो अण्डा प्रतिपेटी तीन हजार ९८० रुपैयाँ, मझौता तीन हजार ७७० रुपैयाँ कायम गरिएको छ ।
यसैगरी शिवम् पोल्ट्री वीरगञ्जको ठूलो अण्डा प्रतिपेटी तीन हजार ९६० रुपैयाँ, मझौता तीन हजार ७६० रुपैयाँ, लक्ष्य पोल्ट्री चितवनको ठूलो अण्डा प्रतिपेटी तीन हजार ९८० रुपैयाँ, मझौता तीन हजार ७८० रुपैयाँ, खजाना एग्रो दाङको ठूलो अण्डा प्रतिपेटी तीन हजार ९७५ रुपैयाँ, मझौता तीन हजार ७७५ रुपैयाँ, नेसनल काजी एग्रो कैलालीको ठूलो अण्डा प्रतिपेटी तीन हजार ९६५ रुपैयाँ, मझौता तीन हजार ७६५ रुपैयाँ मूल्य कायम गरिएको छ ।
त्यस्तै, सुविस/काठमाडौं त्रिशूलीको ठूलो अण्डा प्रतिपेटी तीन हजार ९६० रुपैयाँ, मझौता तीन हजार ७५० रुपैयाँ, मोडेल पोल्ट्री चितवनको ठूलो अण्डा प्रतिपेटी तीन हजार ९५० रुपैयाँ, मझौता तीन हजार ७५५ रुपैयाँ र एनएमए पोल्ट्री झापाको ठूलो अण्डा प्रतिपेटी तीन हजार ९५० रुपैयाँ, मझौता तीन हजार ७६० रुपैयाँ कायम गरिएको सचिव पोखरेलले जानकारी दिए । उनका अनुसार, एउटा पेटीमा सात क्रेट (२१० अण्डा) हुन्छन् ।
लागत मूल्य समयमा पाउन नसकेपछि विगत केही वर्षदेखि किसान यस पेसाबाट पलायन हुन थालेका छन् । पछिल्लो समय उत्पादन घट्नु, कुखुरामा रोग लग्नुलगायत कारणले किसान बैंकको ऋणको भरमा पर्दै आएको व्यवसायी बताउँछन् । रासस
