काठमाडौं । नेकपा एमालेले भदौ १३ गतेका लागि तय गरिएको केन्द्रीय कमिटीको बैठक स्थगित गरेको छ। यो बैठक पार्टीको दोस्रो विधान महाधिवेशनमा पेस गरिने प्रस्तावहरूमाथि छलफल गर्नका लागि बोलाइएको थियो।
पार्टीको प्रचार विभाग प्रमुख राजेन्द्र गौतमका अनुसार, विधान संशोधनको मस्यौदामा प्राप्त भएका सुझावहरूलाई मिलाउन थप समय आवश्यक परेकाले बैठक स्थगित गरिएको हो। सुझाव बुझाउने अन्तिम समयसीमा आजसम्म रहेको र ती सुझावहरूलाई मिलाउन समय लाग्ने भएकाले बैठक हाललाई रोकिएको उनले बताए।
एमालेको दोस्रो विधान महाधिवेशन भदौ २० देखि २२ गतेसम्म हुँदैछ। यही महाधिवेशनमा पेस गर्नका लागि विधान संशोधन मस्यौदामाथि छलफल गर्न बैठक बोलाइएको थियो, जुन अहिले अर्को सूचना नआएसम्मका लागि स्थगित भएको छ।
