काठमाडौँ । अमेरिका र चीनबीच ‘ट्यारिफ’ (भन्सार ) शुल्क समायोजन गर्ने सहमति भएसँगै सोमबार शेयर मार्केट उकालो लागेको छ ।
स्विट्जरल्यान्डको जुरिचमा भएको वार्तापछि एक अर्का विरुद्धमा महँगो आयात कर लगाउने निर्णयबाट दुवै देश पछि हट्ने सहमति भएपछि शेयर बजारले सकारात्मक लय समातेको हो ।
सोमबार युरोपका स्टकमा वृद्धि भएको छ । यसै गरी हङकङमा हाङसेङको सूचकाङ्कमा ३ प्रतिशतले वृद्धि देखिएको छ ।
यो सहमतिले जहाज कम्पनीको शेयरमा सकारात्मक प्रभाव देखिएको छ । डेनमार्कको मेयस्रपमा १२ प्रतिशतसम्म वृद्धि भएको छ । जर्मनीको होपाङ लोयडमा १४ प्रतिशतले वृद्धि भएको छ ।
अमेरिकाले आयात कर १४५ प्रतिशतबाट ३० मा झार्ने र चीनले १२५ बाट १० प्रतिशत बनाउने सहमति भएको छ ।
अमेरिकी राष्ट्रपति डोनाल्ड ट्रम्पले अघिल्ला निर्णयहरू खारेज भएको नभई स्थगित भएको बताएका छन् । उनले तीन महिनामा सबै विषय सकारात्मक बाटोमा नगए यो फेरी बढ्न सक्ने उल्लेख गरेका छन् । यद्यपि पहिले भनिए जस्तै १४५ प्रतिशत पुग्ने अपेक्षा नगरिएको उनको भनाइ छ ।
‘हामी चीनलाई चोट दिन चाहँदैन थियौँ । हाम्रा कारणले उनीहरूलाई धेरै अप्ठेराे भएको साँचो हो । त्यहाँका धेरै कारखाना बन्द भएका छन् । यो डिलले उनीहरू खुसी भएका छन्,’ राष्ट्रपति ट्रम्पले भने । (एजेन्सी)
