काठमाडौँ । माकलबारीस्थित एक वर्कसपमा युवकको हत्या गरी शव गाडेको अभियोगमा ६ जना पक्राउ परेका छन् । सर्लाहीको चक्रघट्टा गाउँपालिका– ८ घर भई हाल गोकर्णेश्वर नगरपालिका– ५ बाहुनधारा बस्ने १९ वर्षका राहुल साहको हत्याको आरोपमा उनीहरुलाई पक्राउ गरिएको प्रहरीले जनाएको छ ।
चैत ११ गतेदेखि हराएका साहको शव चैत १५ गते माकलबारीको आरके मोटरसाइकल वर्कसपको पछाडी जमिनमा गाडीएको अवस्थामा फेला परेको थियो ।
उनी हराएको सूचना पाएपछि खोजतलासका क्रममा शव भेटिएको प्रहरी वृत्त बोद्धले जनाएको छ । घटनाको प्रारम्भिक अनुसन्धानको क्रममा लेनदेनको विषयलाई लिई हत्या गरेको खुलेको प्रहरीले जनाएको छ ।
पक्राउ पर्नेमा सर्लाहीको चक्रघट्टा गाउँपालिका १ घर भई हाल जिल्ला गोकर्णेश्वर ५ बाहुनधारा बस्ने २२ वर्षका निपु मण्डल, १८ वर्षका विजय यादव, १८ वर्षका करन कुमार महतो, २३ वर्षका जोधन मण्डल, ४५ वर्षका उत्तम मण्डल र भारतको बिहार घर भई हाल दक्षिणढोका वस्ने २९ वर्षका सुनिल शर्मा रहेका छन् । उनीहरुलाई काठमाडौं जिल्ला अदालतबाट ५ दिन म्याद थप गरेर अनुसन्धान भइरहेको प्रहरीले जनाएको छ ।
