काठमाडौं । नेकपा एमालेका मन्त्रीहरूले राजीनामा बुझाएका छन् ।
बालुवाटार पुगेर प्रधानमन्त्री पुष्पकमल दाहाल ‘प्रचण्ड’ समक्ष एमालेका सबै ८ मन्त्रीहरूले राजीनामा दिएका हुन् ।
उपप्रधान तथा अर्थमन्त्री विष्णु पौडेलको नेतृत्वमा एमालेका ८ जना सरकारमा थिए । राजीनामा दिने अन्य मन्त्रीहरूमा परराष्ट्रमन्त्री विमला राई पौड्याल, भूमि सुधार, सहकारी तथा गरिबी निवारणमन्त्री राजेन्द्रकुमार राई, कृषिमन्त्री ज्वालावकुमारी साह, महिला, बालबालिका तथा ज्येष्ठ नागरिक मन्त्री भगवती चौधरी, सहरी विकास मन्त्री दामोदर भण्डारी र स्वास्थ्यमन्त्री पदम गिरी र रक्षामन्त्री हरी उप्रेती छन् ।
सोमवार पार्टी केन्द्रिय कार्यालय च्यासलमा बसेको पार्टीको केन्द्रिय सचिवालय बैठकले सरकारबाट बाहिरिने निर्णय गरेपछि एमालेका मन्त्रीले राजीनामा बुझाएका हुन् ।
अब प्रचण्ड नेतृत्वको सरकारमा माओवादी र जनमत पार्टी मात्रै छन् । ६ दलिय गठबन्धनमा राजपा सरकारमा सामेल थिएन भने अन्य तीन एमाले, राप्रपा र रास्वपा सरकारबाट बाहिरिएका छन् ।
