काठमाडौं । नेकपा माओवादी केन्द्रले सहमतिमा केन्द्रीय सदस्य छनौटका लागि शनिबार निर्धारण गरिएको निर्वाचन कार्यक्रम आज दिउँसोसम्मका लागि स्थगित गरेको छ ।
माओवादी केन्द्रको केन्द्रीय निर्वाचन आयोगले शनिबार रातिका लागि निर्धारण गरेको निर्वाचन कार्यक्रमहरु आज दिउँसोदेखि अघि बढ्ने गरी स्थगित गरिएको संयोजक विष्णुपुकार श्रेष्ठले जानकारी दिए ।
उनले भने, ‘शनिबार राति ८ बजेबाट मनोनयन शुरु गर्ने भनेका थियौं । तर, नेताहरुले भोलि (आइतबार) दिउँसो १ बजेसम्म सहमतिको प्रयास गर्ने भनेपछि निर्वाचन कार्यतालिका हेरफेर भएको छ।’
माओवादी केन्दका नेता दलजित श्रीपाइलीका अनुसार सहमतिमा केन्द्रीय सदस्य छनौटमा मतभेद भएकाले निर्वाचन तालिका प्रभावित भएको हो ।
श्रीपाइलीका अनुसार सबै प्रतिनिधिहरुले समानुपातिक समावेशिताको कुरा सशक्त रुपमा उठाएका छन् । त्यसमा पनि कुरा मिल्न बाँकी भएकाले बन्दसत्र स्थगन भएको हो ।
समानुपातिक पद्धतितर्फको केन्द्रीय सदस्यका लागि तय गरिएको क्लस्टरमा पनि कतिपयले असन्तुष्टि जनाएका छन् । दलित समुदायले आफूहरुले विगतमा पाउने भनिएको भन्दा कम प्रतिशत दिन खोजिएको भन्दै विरोध जनाएका छन् ।
‘आएका नामहरुमा पनि कतिपय डुब्लिकेसन हुन सक्छ । भनिएको भन्दा बढी वा कम आएको पनि हुन सक्छ । कतिपयलाई केन्द्रीय कमिटी भन्दा अन्य जिम्मेवारी दिन सकिने पनि हुन सक्छ’ एक नेता भन्छन्, ‘हामीले तय गरेको समानुपातिक समावेशी सहभागिता पनि हेर्नुपर्छ ।’
बन्दसत्र हलबाट पारित विधानअनुसार अब पार्टीको केन्द्रीय कमिटी ५० प्रतिशत खुल्ला र ५० प्रतिशत पूर्ण समानुपातिक गरी मिश्रित निर्वाचन प्रणालीका माध्यमबाट चुनिनेछ ।
माओवादीको महाधिवेशनबाट पारित विधानअनुसार केन्द्रीय समितिका १५४ सदस्य समानुपातिक पद्धतिबाट चयन हुनेछन् । समानुपातिक पद्धतिबाट विभिन्न क्लस्टर अनुसार केन्द्रीय समितिमा चयन हुने नेताको नाम टुंगो लगाउने जिम्मा प्रदेश समितिलाई दिइएको एक नेताले जानकारी दिए । तर, प्रदेशहरुले पनि नेताहरुको नाम सिफारिस गरिसकेका छैनन् । नेताहरुका अनुसार क-कसको नाम सिफारिस गर्ने भनेर प्रदेश कमिटीमै सहमति हुन सकेको छैन ।
समानुपातिक पद्धतितर्फ प्रदेश १ बाट २१, प्रदेश २ बाट २५, वागमतीबाट ३०, गण्डकीबाट १४, लुम्बिनीबाट २३, कर्णालीबाट १७, सुदूरपश्चिमबाट १६ र विशेष क्षेत्रबाट ८ जना गरी कुल १५४ जना चयन हुनेछन् । केन्द्रीय सदस्यका बाँकी सदस्य भने खुला प्रतिस्पर्धाबाट चयन हुनेछन् ।
केन्द्रीय कमिटी २९९ सदस्यीय हुनेछ । यसअघि केन्द्रीय कमिटीले १० प्रतिशत मनोनीत गर्ने भनिएकोमा बढाएर १५ प्रतिशत पुर्याइएको छ ।
महाधिवेशनले केन्द्रीय कमिटी, केन्द्रीय कमिटीले पोलिटव्यूरो, स्थायी कमिटी र पदाधिकारी चयन गर्नेछ । पोलिटव्यूरो, स्थायी कमिटी र पदाधिकारी समावेशी सिद्धान्तका आधारमा चयन हुनेछ ।
केन्द्रीय कमिटीमा सबै क्लस्टर र खुल्लाबाट गरी ३५ प्रतिशत महिला र २० प्रतिशत ४० वर्षमुनिका युवाको प्रतिनिधित्व हुनेछ।
माओवादी केन्द्रले केन्द्रीय कमिटीमा ४० वर्षमुनिका युवालाई २० प्रतिशत कोटा छुट्याएको छ । २९९ सदस्यीय केन्द्रीय कमिटीमा यो भनेको ६० जना हो । तर, आकांक्षीहरु सयभन्दा बढी देखिएको हुनाले विवाद उत्पन्न भएको हो ।
