सिन्धुली । सिन्धुलीको हरिहरपुरगढी गाउँपालिकाका दर्जनौँ गाउँ बिजुली बाल्ने प्रतीक्षामा बसेको वर्ष बितिसक्यो । तर, गाउँमा अझै बिजुली बाल्न सकेको छैन ।
गाउँपालिकाभरि एकै साथ बिद्युत् करण गर्ने काम सुरु भएको भए पनि केही पालिकाका केही गाउँमा मात्र बिजुली बलेको स्थानीयको भनाइ छ । अझै दर्जनौँ गाउँ बिजुली बाल्ने पर्खाइमा अन्धकारमा रात काटिरहेका छन् । गाउँपालिका प्रमुख कारसाङ लामाका अनुसार गाउँपालिकाको वडा नम्बर १, २, ४ र ५ का आंशिक घरधुरीले बिजुली बाल्न सुरु गरेका छन् । गाउँपालिका प्रमुख लामाका अनुसार केही वडामा अहिले पनि संरचना निर्माणको काम चलिरहेको छ । पोल र तारको काम सम्पन्न भइसकेको स्थानमा पनि बिजुली बलेको छैन ।
गाउँ पालिकाकाले ध्यान नदिएको र ठेकेदार कम्पनीले समेत बेवास्ता गर्दा आफूहरूले समयमै बिजुली बाल्न नपाएको हरिहपुरगढी गाउँपालिका–६, का स्थानीय आइते लामाले गुनासो गर्नुभयो । ‘हामी वर्ष दिनदेखि बिजुलीको पोल र तार हेरी रहेका छौं,’ उहाँले भन्नुभयो, ‘काम सकिएको ठाउँमा पनि किन यतिको समय बिजुली बाल्न नदिएका हो ? उता सरकार बिजुली खेर गयो भन्छ । कुरा बुझ्न सकेको छैन । विभिन्न बहानामा काममा ढिलासुस्ती गरेको स्थानीयको आरोप छ ।’
गाउँपालिकाले गाउँमा बिद्युतीकरणका लागि वल्र्ड बैँकलाई ठेक्का दिएको गाउँपालिका प्रमुख लामाले बताउनुभयो । भौतिक संरचना निर्माण भई सकेको स्थानमा तुरुन्तै बिद्युत् सञ्चालनको तयारी भइरहेको उहाँको दाबी छ । वडा नम्बर ३ र ६ मा संरचना निर्माण सम्पन्न भइसकेको छ । गाउँपालिका प्रमुख लामाले भन्नुभयो, बिजुली छोड्न मात्र बाँकी छ । वर्षातले बाटो बिगारे पछि, समयमै सामान पुर्याउन नसक्दा काममा ढिलाइ भएको उहाँको भनाइ थियो।
स्थानीयका अनुसार हाल पोल र तारको काम सम्पन्न भएको स्थानमा वैशाख मसान्तसम्ममा बिजुली बाल्ने योजना ठेकेदार गाउँपालिकाले सुनाएको थियो । त्यसपछि फेरी भाका अषाढ मसान्तलाई सारिएको थियो । हाल आएर अझै अन्योलमा राखेपछि आफूहरू समस्यामा परेको उनीहरूको भनाइ छ । बिजुलीको प्रयोगबाट खाने पानी लगाएतको समस्या समेत समाधान हुने अपेक्षामा बसेका स्थानीय हिउँदमा काकाकुल हुनुपर्ने चिन्तामा परेको बताउँछन् ।
गाउँमा बिजुलीको पोल र तार लागेको वर्ष दिन बित्न लाग्दासमेत बिजुली बल्ने कुनै छाटकाट नदेखिएपछि निराशा छाएको स्थानीय उपेन्द्र थिङको भनाई छ । गाउँपालिकाको झण्डै ५२ सय घरधुरी मध्य यस अभियानबाट ७५ प्रतिशत घरधुरीले बिजुली बाल्न पाउने गाउँपालिकाको दाबी छ । बाँकी घर धुरीमा पनि ग्रामीण विद्युतीकरणबाट बिजुलीको व्यवस्था गर्ने तयारी भइरहेको छ । गाउँपालिकाले अभियानकै रूपमा यस वर्ष भित्रमा ३५ देखि ३८ घरधुरीमा बिजुली बाल्ने लक्ष्य लिएको गाउँपालिकाका प्रमुख लामाले बताउनुभयो ।
बिद्युतको पहुँच, नागरिकको सुविधा र विकासको समेत आधार भएकोले यस तर्फ गाउँपालिकाले विशेष ध्यान दिएको पालिकाले जनाएको छ । बिद्युतको पहुँचबाहिर रहेका गाउँपालिकाका स्थानीय अहिले पनि टुकीको भरमा बस्न बाध्य छन् । बिजुलीको व्यवस्था नभएका कारण अन्य सुविधा समेत नागरिकको पहुँचमा पुर्याउन कठिन भएको गाउँपालिकाको भनाइ छ । बिजुलीको पहुँच नभएका कारण गाउँपालिकाका महिलाहरू समस्यामा परेका गाउँपालिकाकी उपमेयर अनिता कुमारी राईले तर्क गर्नुभयो ।
यता ठेकेदार कम्पनीका प्रतिनिधि भक्तराम थोकरले गाउँपालिका र स्थानीयको समस्याकै कारण काममा ढिलाइ भएको बताउनुभयो । ‘सुरुमा गाउँ सम्म सामान पुर्याउन समस्या भयो, फेरी गाउँमा पनि विवाद भयो ।’ उहाँले भन्नुभयो, ‘पछि फेरी बर्सातका कारण सडक नै भएन हामी जति सक्तो छिटो गर्ने प्रयास गरिरहेका छौ, तर कहिले सम्म वत्ति बल्छ ? त्यो भन्न सक्दैनौ ।’ गाउँ पालिकाले गरेको ढिला सुस्तीकै कारण त्यहाँका जनताले समयमै बिजुली बाल्न नपाएको उहाँको दाबी छ ।
भौतिक संरचना निर्माण सकिएको ठाउँमा समेत गाउँपालिकाले अनुगमन लगायतको काममा तदारुकता नदेखाउँदा नागरिकले दशैं पहिला बिजुली बाल्न नपाएको उनीहरूको भनाइ छ । सर्लाहीको बागमती नगरपालिकासँग सीमा जोडिएको सिन्धुलीको हरिहरपुरगढी गाउँपालिकाका स्थानीयले वर्षौदेखि एक घण्टा पैदल दुरीमा पर्ने सर्लाही तर्फ बिजुली बलेको देख्दै आएका छन् । तर, आफूहरू वर्षौदेखि अन्धकारमा बस्न बाध्य भएको उनीहरूको गुनासो छ । अधिकांश चुरेको गाउँ भएकोले पनि बाटोको समस्या भएको ठेकेदार कम्पनीले जनाएको छ ।
