दार्चुला । दार्चुलामा कांग्रेसको अधिवेशनबाट वडा उपसभापतिमा चयन भएका एकजना एमालेको वडा सचिवमा चयन भएका छन् । गत ९ असोजमा सम्पन्न नेपाली कांग्रेसको वडा महाधिवेशनबाट शंकर सिंह डोबाल महाकाली नगरपालिका–२ को उपसभापतिमा चयन हुनुभएको थियो । शनिबार गरिएको नेकपा एमालेको वडा अधिवेशनमा डोबाल सचिवमा चयन हुनुभएको छ ।
‘कांग्रेसले सम्पन्न गरेको वडा अधिवेशनमा डोबाल उपसभापतिमा चयन हुनुभएको हो । एमालेमा प्रवेश गरे नगरेकोबारे जानकारी छैन’, कांग्रेस महाकालि नगरपालिकाका प्रवक्ता पदम सिंह महरले भन्नुभयो ।
शनिबार सम्पन्न गरिएको वडा अधिवेशनमा वीर सिंह डोबाल अध्यक्ष र शंकर सिंह डोबाल सचिवमा चयन गरिएको नेकपा एमाले दार्चुलाले जनाएको छ ।
केही वडामा अधिवेशन सम्पन्न
नेकपा एमाले दार्चुलाले शनिबार दार्चुलाका स्थानीय तहहरूमा ६१ वटा वडाहरू मध्ये केही वडामा अधिवेशन सम्पन्न गरेको छ । अधिवेशनको तयारी गरिएका वडाहरूमा शनिबार गरिएको र बाँकीमा गरिने एमाले दार्चुलाका प्रचारप्रसार विभाग प्रमुख खडक बडालले बताउनुभयो ।
शैल्यशिखर नगरपालिका–६ को वडा अधिवेशनबाट सुरेन्द्रराज विष्ट अध्यक्ष तथा रमेश सिंह धामी सचिव रहने गरी ३१ सदस्यीय वडा कमिटी चयन गरेको छ ।
शैल्यशिखर नगरपालिका–७ को वडा अधिवेशनबाट नवराज भट्ट वडा कमिटी अध्यक्षमा सर्वसम्मत चयन हुनुभएको छ । ३१ सदस्यीय वडा कमिटी सर्वसम्मत चयन गरिएको नेकपा एमाले जिल्ला कमिटी सदस्य पुष्पराज जोशीले जानकारी दिनुभयो ।
मालिकार्जुन गाउँपालिका–१ को वडा कमिटी अध्यक्षमा रमेशसिंह बोहरा सर्वसम्मत चयन गरिएका छन् । महाकालीनगरपालिका–२ मा अध्यक्षमा वीर सिंह डोबाल र सचिवमा शंकर सिंह डोबाल रहने गरी २७ सदस्यीय समिति गठन गरिएको छ ।
महाकाली नगरपालिका–३ मा बलदेव सिंह महर अध्यक्ष रहने गरी ३१ सदस्यीय, वडा नम्बर ९ मा कृष्ण सामन्त अध्यक्ष रहने गरी ३१ सदस्यीय समिति गठन गरिएको छ भने वडा नम्बर ७ मा किसन रैखोला अध्यक्ष रहने गरी ३१ सदस्यीय समिति गठन गरिएको एमाले दार्चुलाका प्रचारप्रसार विभाग प्रमुख खडक बडालले बताउनुभयो ।
महाकाली नगरपालिका–८ मा भवानसिह धामी अध्यक्ष, देव सिंह विष्ट उपाध्यक्ष तथा जगत सिंह साउँद सचिव रहने गरी २१ सदस्यीय समिति गठन गरिएको छ ।
ब्यास गाउँपालिका–६ मा प्रमानन्द भट्ट अध्यक्ष रहने गरी ३१ सदस्यीय वडा कमिटी गठन गरिएको नेकपा एमालेका जिल्ला सदस्य एवं ब्यास गाउँपालिका–३ का वडाध्यक्ष उपेन्द्र सिंह धामीले जानकारी दिए । दुहुँ गाउँपालिका–१ को वडा कमिटी अध्यक्षमा मदन सिंह भण्डारीलाई चयन गरिएको छ ।
मार्मा गाउँपालिका–१ को वडा अधिवेशनले रिउले धामी अध्यक्ष, तथा पूर्ण बोहरा सचिव रहने गरी ३१ सदस्यीय वडा कमिटी गठन गरिएको छ ।
नौगाड गाउँपालिका–५ को वडाअधिवेशनबाट ५ जना पदाधिकारीसहित ३१ सदस्यीय वडा कमिटी सर्वसम्मत चयन गरिएको जनाएको छ । अंगवीर सिह धामी अध्यक्ष रहने गरी ३१ सदस्यीय वडा कमिटी सर्वसम्मत चयन गरिएको नेकपा एमाले जिल्ला कमिटी सचिव ज्ञानेन्द्र घर्तीले जानकारी दिनुभयो ।
लेकम गाउँपालिका–३ मा रमेशप्रसाद भट्टको अध्यक्षतामा ३१ सदस्यीय वडा कमिटी चयन गरिएको छ । वडा नम्बर ४ मा डम्बरबहादुर पालको अध्यक्षतामा ३१ सदस्यीय कमिटी चयन गरिएको छ । वडा नम्बर ५ मा केशवदत्त जोशीको अध्यक्षतामा ३१ सदस्यीय वडा कमिटी गठन गरिएको नेकपा एमाले दार्चुलाले जनाएको छ ।
