अर्घाखाँची । गुल्मीको मुसिकोट नगरपालिका–४ दोभानमा जिप दुर्घटना हुँदा ३ जनाको मृत्यु भएको छ ।
शान्तिपुरबाट सदरमुकाम तम्घासतर्फ आउँदै गरेको लु १ ज ४५५९ नम्बरको जिप दोभानमा दुर्घटना हुँदा गुल्मी चन्द्रकोट गाउँपालिका–४ बस्ने अन्दाजी ४५ वर्षीय तेजेन्द्र थापा, सोही गाउँपालिका–५ का काजी भन्ने रेशम कार्कीको घटनास्थलमै मृत्यु भएको प्रहरी नायब उपरीक्षक पुरुषोत्तमप्रसाद पाण्डेले बताउनुभयो । कार्कीको उमेर खुलेको छैन । मृतक अर्की एक महिलाको सनाखत हुन बाँकी रहेको उहाँले बताउनुभयो ।
दुर्घटनामा ७ जना घाइते छन् । एकजनाको अवस्था गम्भीर छ । सबैको गुल्मी अस्पतालमा उपचार भइरहेको छ । जिप सडकदेखि करिब ५ सय मिटर तल खसेको छ । वर्षाले बाटो बिग्रिएकाले दुर्घटना भएको हुन सक्ने प्रहरीले जनाएको छ । जिप चालक पनि घाइते छन् ।
