उपत्यकामा थपिए एकैदिन ४५४ जना कोरोना संक्रमित

काठमाडौं । पछिल्लो २४ घन्टामा काठमाडौं उपत्यकामा थप ४ सय ५४ जनामा कोरोना संक्रमण पुष्टि भएको छ । योसँगै उपत्यकामा कोरोना भाइरसबाट संक्रमित हुनेको संख्या ७ हजार ४ सय ९३ पुगेको स्वास्थ्य तथा जनसंख्या मन्त्रालयका प्रवक्ता डा जागेश्वर गौतमले जानकारी दिएका छन् ।
स्वास्थ्य तथा जनसंख्या मन्त्रालयका अनुसार पछिल्लो २४ घण्टामा काठमाडौंमा ३८६, ललितपुरमा ३६ र भक्तपुरमा ३२ संक्रमित थपिएका हुन्। हालसम्म काठमाडौंमा ५ हजार ६सय २२ ललितपुरका ८१८ र भक्तपुरमा ५९८ संक्रमित पुगेका छन्।
पछिल्लो २४ घण्टामा देशभरमा १ हजार ३ सय ५९ जनामा कोरोना भाइरसको संक्रमण पुष्टि भएको छ । आज थपिएका समेत गरेर कुल संक्रमितको संख्या ४४ हजार २३६ पुगेको छ ।
त्यस्तै पछिल्लो २४ घण्टामा १ हजार ३ सय ५४ जना निको भएका छन्। यो सँगै २५ हजार ५६१ जना निको भएर घर फर्किएका छन्।