वडाध्यक्ष चौरसियासहित ३ जना विरुद्ध अभियोगपत्र दायर

वीरगंज / वीरगंज महानगर–१६ का वडाध्यक्ष श्यामबाबू चौरसियामाथि अख्तियार दुरुपयोग अनुसन्धान आयोगले भ्रष्टाचारको मुद्दा दायर गरेको छ ।
१ लाख ७७ हजार रुपैयाँ भ्रष्टाचार गरेको भन्दै अख्तियार दुरुपयोग अनुसन्धान आयोगले शुक्रवार विशेष अदालतमा मुद्दा दायर गरेको छ । आयोगले राजस्व छल्ने मनसायले जग्गा किनबेच गर्ने अन्य दुईजनामाथि पनि मुद्दा चलाएको छ ।
जहराती मियाँ धुनियाको वीरगंज महानगरपालिका–१६ साबिक इनर्वाभाठा–५ को जग्गासँग टाँसिएको २८ फिटको पिच बाटो देखिएको र सो जग्गाको मालपोत कार्यालय पर्साको आव २०७४/०७५ को न्यूनतम मूल्याङ्कन रु ६० लाख देखिएकोमा जग्गाधनी मियाँले ज्ञानती देवीलाई २०७४/१२/ ९ मा सो जग्गा बेच्दा मूल्याङ्कन ३३ लाख तोकी सिफारिश गरेको आरोपमा वडाध्यक्षलगायत जग्गा किनबेच गर्ने दुवैमाथि मुद्दा दायर गरेको हो । ६० लाख मूल्य पर्ने जग्गामा रु ७ लाखको थैली देखाएको, गलत घरबाटो सिफारिश गरेको आरोपमा भ्रष्टाचारको मुद्दा लागेको हो ।
वडाध्यक्ष चौरसियाले जग्गा खरिद बिक्री हुने बेला घरबाटो सिफारिस गर्दा २८ फीटको पीच बाटो भएको सिफारिस पत्र नराखी १५ फीटको ग्राबेल बाटो भनी गलत लिखत तयार गरी घरबाटो सिफारिस गरेको थिए । उनले दिएको सिफारिशका आधारमा मूल्याकंन घटाएर रजिष्ट्रेशन दस्तुर तथा लाभकर समेत छलेको भन्दै वडाध्यक्ष चौरसिया बिरुद्ध बिशेष अदालतमा उजुरी परेको हो । यो उजुरी संग वडाध्यक्ष चौरसियाको वडाध्यक्ष पद समेत निलम्वित हुन पुगेको छ ।
वडाध्यक्ष चौरसियालाई १ लाख ७७ हजार जरिवानासहित ३ महीनादेखि ३ वर्षको कैद सजायको मागसहित शुक्रवार विशेष अदालतमा मुद्दा दायर गरेको छ । जग्गाधनी मियाँले जग्गा बेच्दा पूँजीगत लाभकर छल्न खोजेको भन्दै ८२ हजार बिगोसहित दुई वर्ष कैद माग गरिएको छ । जग्गा किन्ने ज्ञानती देवीले रजिस्टे«शन शुल्क तिर्न दुवैसँग मिलेमतो गरेको कारण ९४ हजार बिगो फिर्ता नहुने गरी र दुई वर्षको कैद मागसहित अभियोगपत्र दायर गरिएको छ ।
यसरी कम थैली रकम राख्दा जग्गा किनबेच गर्दा प्राप्त हुने रजिष्ट्रेशन दस्तुर ९४ हजार ८ सय ७५ र पुँजीगत लाभकर ८२ हजार ५ सय गरी १ लाख ७७ हजार ३ सय ७५ कम हुने गरी राजशव दाखिला गरी राजस्व हानी र्पुयाएका थिए ।