काठमाडौँ । नेपाल आयल निगमको ५०औँ वार्षिकोत्सवका अवसरमा रक्तदान कार्यक्रमको आयोजना गरिएको छ । आयल निगमले स्वर्णजयन्तीका अवसरमा बिहीबार आयोजना गरेको रक्तदान कार्यक्रममा ११३ जनाले रक्तदान गरेको रक्तदान समितिका संयोजक विकास बखतीले राससलाई जानकारी दिनुभयो ।
कार्यक्रममा निगमका कार्यकारी निर्देशक सुरेन्द्रकुमार पौडेलले रक्तदान जीवनदान भएको बताउँदै यस कार्यलाई मानवजीवनका लागि अत्यन्तै मानवीय, परोपकारी तथा सकारात्मक रूपमा लिनुपर्ने बताउनुभयो । सोही अवसरमा कार्यकारी निर्देशक पौडेलले नेपालमै सबैभन्दा धेरैपटक रक्तदान गर्ने रक्तदाता प्रेमसागर कर्माचार्य र समाजसेवी वीरसिंह कङ्साकारलाई सम्मान गर्नुभएको थियो । कर्माचार्यले यसभन्दा पहिला १६० पटक रक्तदान गर्नुभएको थियो । आयल निगमको ५०औँ वार्षिकोत्सव आगामी शनिबार हुँदैछ ।
