रौतहटमा विष्फोट गराउने पक्राउ

रौतहट । रौतहटको इशनाथ नगरपालिकास्थित मठिया प्रहरी चौकीमा विष्फोट गराउने मध्येका एक पक्राउ परेका छन् । पक्राउ पर्नेमा भारत बिहारको ढाका भन्ने स्थानका चन्दन कुमार रहेको प्रहरीले जनाएको छ । उनले प्रयोग गरेको बीआर०५एच६५०९ नम्बरको मोटरसाइकल पनि प्रहरीले नियन्त्रणमा लिएको छ । उनीसँगै मोटरसाइकलमा सवार अर्का व्यक्ति भने फरार भएको प्रहरीले जनाएको छ ।
विस्फोटबाट प्रहरी चौकीको सेन्ट्री पोष्टमा बसेका प्रहरी जवान रञ्जित यादव घाइते भएको बताइएको छ । भारतसँगको सीमा क्षेत्रमा पर्ने सो चौकीमा विस्फोट भएको खबर प्राप्त भएको रौतहट प्रहरी प्रमुख एसपी भूपेन्द्र खत्रीले बताएका छन् । थप विवरण लिने प्रयास भइरहेको उनले बताएका छन् ।
सो ठाउँमा जिल्ला प्रहरी कार्यालयबाट थप टोली पठाइसकेको पनि उनले बताएका छन् ।