गण्डकी प्रदेशका मुख्यमन्त्री पृथ्वीसुब्बा गुरुङले ५ वर्षभित्रमा देखिने गरी विकास गर्ने लक्ष्यका साथ सरकार क्रियाशील भएको बताउनुभएको छ ।
६९औँ राष्ट्रिय प्रजातन्त्र दिवसका अवसरमा पोखरा–२२ पुम्दीभुम्दीस्थित फुस्रेखोलामाथि निर्माणाधीन पुलको आज शिलान्यास गर्दै उहाँले परिवर्तित संरचनानुसार सङ्घ, प्रदेश र स्थानीय तहबीच अधिकारको बाँडफाँट हुनुपर्ने बताउनुभयो । राष्ट्रिय प्रजातन्त्र दिवस मूल समारोह समितिका संयोजकसमेत रहनुभएका मुख्यमन्त्री गुरुङले प्रदेशलाई आप्mनो पाँचवर्षे कार्यकालमा विकास तथा समृद्धियुक्त बनाउन आफूहरु प्रयासरत रहेको बताउनुभयो ।
भौतिक पूर्वाधार तथा विकासमन्त्री रामशरण बस्नेतले यस आर्थिक वर्षमा गण्डकी प्रदेशभित्र ७० मोटर चल्ने पुल बन्न लागेको जानकारी दिँदै तोकिएकै समयमा गुणस्तरीय निर्माण सम्पन्न गर्न निर्माण कम्पनीलाई निर्देशन दिनुभयो । प्रदेशका मुख्य सचिव लक्ष्मीप्रसाद पौडेलले गुणस्तरीय निर्माणका लागि स्थानीयवासी सचेत रहनुपर्ने बताउनुभयो ।
फुस्रेखोला चिसापानी सडकखण्डमा निर्माणाधीन ३८ मिटर लम्बाइ र ६ मिटर चौडाइको उक्त पुल गण्डकी प्रदेश सरकारको रु तीन करोड ९८ लाख ४८ हजारको लागतमा बन्न लागेको हो । पोखरा–२२ का वडाध्यक्ष मित्रलाल बरालले सो पुल निर्माणसँग यस क्षेत्रको कृषि उत्पादन बजारीकरणमा महत्वपूर्ण सहयोग पुग्ने बताउनुभयो । नेकपाका नेता लीलाधर पौडेल, भौतिक पूर्वाधार तथा विकास मन्त्रालयका सचिव ईश्वरचन्द्र मरहट्ठा लगायतले पुल निर्माणसँगै यस क्षेत्रलाई स्याङ्जास्थित सिद्धार्थ राजमार्गसँग जोड्ने बताउनुभयो ।
