बुटवल, प्रदेश नंं ५ का सभामुख पूर्णबहादुर घर्तीले गणतन्त्रको संस्थागत विकास र संविधानको कार्यान्वयन गरेर समृद्धिको यात्रा प्रारम्भ गर्नुपर्ने बताउनुभएको छ ।
बुटवल मिडिया प्रकाशन प्रालिद्वारा सञ्चालित दैनिक पत्र पत्रिकाको १५ आँै वार्षिकोत्सवको अवसरमा उहाँले विगतका वर्ष राजनीतिक आन्दोलन र अधिकार प्राप्तिको वर्ष भएको भन्दै अबको समय सुखी नेपाली र समृद्ध नेपाल निर्माणको समय हुने धारणा राख्नुभयो ।
संविधानको मौलिक हकमा नै शिक्षा, स्वास्थ्य, रोजगार, समानताजस्ता हक प्रत्याभूत गरिएको भन्दै सभामुख घर्तीले सङ्घीयता, समावेशी, समानुपातिक सहभागिता संविधानमा उल्लेख हुनु ठूलो उपलब्धि भएको चर्चा गर्नुभयो ।
प्रदेश नंं ५ का विपक्षी दलका नेता बलदेव शर्मा पोख्रेलले पत्रकारिता निष्पक्ष र व्यावसायिक हुनुपर्नेमा जोड दिनुभयो । कार्यक्रममा पूर्वसांसद रामचन्द्र भट्टराई, पत्रकार महासङ्घ प्रदेश नं ५ का उपाध्यक्ष भरत केसीलगायतले बोल्नुभएको थियो । पत्रिकाका सम्पादक बालकृष्ण चापागाईंले अबको पत्रकारिता मिशनसहितको व्यावसायिकता हुनुपर्नेमा जोड दिनुभयो ।रासस
