कास्की, गण्डकी प्रदेशका मुख्यमन्त्री पृथ्वीसुब्बा गुरुङले प्रेस स्वतन्त्रताको पालनामा प्रदेश सरकार प्रतिबद्ध रहेको बताउनुभएको छ ।
नेपाल पत्रकार महासङ्घ कास्कीले यहाँ आयोजना गरेको प्रेस स्वतन्त्रताको प्रत्याभूतिका लागि नीतिगत छलफल कार्यक्रममा उहाँले कानून, आफ्नो सीमा र हैसियतअनुसार प्रेस स्वतन्त्रतालाई सम्मान गर्दै काम गर्न प्रदेश सरकार प्रतिबद्ध रहेको स्पष्ट पार्नुभयो ।
मुख्यमन्त्री गुरुङले प्रदेश सरकारले आमसञ्चार नीति बनाउन लागेको जानकारी दिदैं “प्रदेश सरकारले आमसञ्चार नीतिको मस्यौदा तयार गरिसकेको छ, यसबारेमा मन्त्रिपरिषद्मा समेत छलफल भएको छ”, भन्नुभयो ।
सञ्चारमाध्यम र सञ्चारकर्मीको सुरक्षा, संरक्षण तथा श्रमजीवीका विषय सञ्चारनीतिमा समावेश भएकाले सबै विषय यसले सम्बोधन गर्ने धारणा पनि उहाँले व्यक्त गर्नुभयो ।
नेपाल पत्रकार महासङ्घका अध्यक्ष गोविन्द आचार्यले प्रदेश तथा स्थानीय सरकारले सञ्चार नीति बनाउँदा सरोकार भएकालाई सहभागी गराउन आग्रह गर्नुभयो ।
महासङ्घका केन्द्रीय सदस्य रामकृष्ण ज्ञवालीले प्रदेश तथा स्थानीय तहका सरकारी कार्यालयका विज्ञापन स्थानीय सञ्चारमाध्ममै प्रकाशन प्रसारण हुने व्यवस्था गर्न माग गर्नुभयो ।
महासङ्घ कास्की शाखाका अध्यक्ष दीपेन्द्र श्रेष्ठले सरकारका असल काममा पत्रकारिता क्षेत्रले सदैव सहयोग गर्ने र गलत कार्यमा आलोचना गर्ने बताउनुभयो ।
छलफलमा सहभागी सञ्चारकर्मीले प्रदेश सरकारले बनाउने नयाँ सञ्चारनीतिमा स्थानीय सञ्चारमाध्यमको सवलीकरण, समानुपातिक विज्ञापन नीति, न्यूनतम पारिश्रमिक लागू हुनुपर्नेलगायत विषयमा जोड दिएका थिए । रासस
