काठमाडौं । आई.सी.सी. यु-१९ महिला टी-२० विश्वकप आज (शनिबार) देखि मलेसियामा शुरु हुँदैछ।
आज प्रतियोगिताको पहिलो दिन ६ खेल हुँदैछन् जहाँ नेपालले पनि आफ्नो पहिलो खेल खेल्ने छ । आज नेपालले बंगलादेश सँग प्रतिस्पर्धा गर्नेछ।
नेपाल र बंगलादेश बीचको खेल नेपाली समय अनुसार दिउँसो सवा १२ बजे शुरु हुनेछ। मलेसियाको बाङ्गी स्थित यूकेएम क्रिकेट ओभलमा उक्त खेल हुनेछ ।
विश्वकपको समूह ‘ए’ मा आयोजक मलेसिया सहित भारत, श्रीलङ्का र वेस्ट इण्डिज छन् भने समूह ‘बी’ मा इङ्ग्ल्याण्ड, आयरल्याण्ड, पाकिस्तान र अमेरिका छन्। समूह ‘सी’ मा न्यूजील्याण्ड, समोआ, दक्षिण अफ्रिका र नाजेरिया छन्। यस्तै, समूह ‘डी’ मा परेको नेपाल, बंगलादेश सँगै अस्ट्रेलिया र स्कटल्याण्ड छन्।
नेपालले दोस्रो खेल माघ ७ गते स्कटल्याण्ड सँग खेल्नेछ भने तेस्रो खेल माघ ९ गते अस्ट्रेलिया सँग हुनेछ ।
