शुक्रबारबाट पोखरामा मुख्यमन्त्री सम्मेलन, प्रधानमन्त्री पनि सहभागि हुने

कास्की । गण्डकी प्रदेशको अगुवाइमा सातै प्रदेशका मुख्यमन्त्री पोखरामा भेला हुने भएका छन् । शुक्रबारबाट शुरु हुने सम्मेलन शनिबारसम्म हुने छ ।
भेलामा प्रदेशले पाउनुपर्ने अधिकार, एकीकृत विकास मोडललगायत विषयमा छलफल हुनेछ । मुख्यमन्त्रीहरूको भेलामा प्रदेश सरकारका समस्या सुन्न प्रधानमन्त्री पुष्पकमल दाहाल पनि पोखरा आउने कार्यक्रम रहेको बताइएको छ ।
जेठ १० मा गर्ने भनिएको सम्मेलन प्रधानमन्त्रीको व्यस्तताका कारण स्थगित भएको थियो ।
यसअघि २०७५ साल भदौ २१ र २२ गते गण्डकीका तत्कालीन मुख्यमन्त्री पृथ्वीसुब्बा गुरुङको पहलमा भेला भएको थियो । त्यो भेलाले आठ बुँदे घोषणापत्र जारी गरेको थियो ।
प्रदेशमा आवश्यक ऐन, कार्यविधि र सचिवालय गठन गर्नुपर्ने, प्रदेशमा रहने कर्मचारीहरू सबै प्रदेशको मातहतमा सञ्चालन हुनुपर्ने, आन्तरिक बढुवा हुँदा प्रदेशको कामलाई मुख्य मापदण्ड बनाउनुपर्ने, सबैको सरुवा, नियन्त्रण गर्ने अधिकार प्रदेश सरकारको हुनुपर्ने, प्रदेशले संघीय सरकारमा पठाएको रिपोर्ट कार्यान्वयन हुनुपर्ने माग पहिलो भेलाले संघ सरकारसँग राखेको थियो ।