रुकुमपश्चिम जिप दुर्घटना ५ जनाको मृत्यु, १० घाइते

सुर्खेत । रुकुमपश्चिमको बाँफिकोट गाउँपालिकामा बिहानै जिप दुर्घटना भएको छ । दुर्घटनामा पाँच जनाको मृत्यु भएको छ भने १० जना घाइते भएका छन् ।
सानीभेरी गाउँपालिकाबाट रुकुमपश्चिमको खलंगाका लागि छुटेको लु १ ज १७४७ नम्बरको जिप बाँफिकोट गाउँपालिका–८ तोरीधारामा बिहान ७ बजे सडकबाट अन्दाजी ४०० मिटर तल खसेको थियो ।
दुर्घटनामा सानीभेरी गाउँपालिकाका ७० वर्षीय कर्णबहादुर बाडा मगर, अन्दाजी ५० वर्षका देउचन खत्री, बाँफिकोट गाउँपालिका–८ का २२ वर्षीय रेखा खनाल (केसी), उनको छोरा रोशन केसी र सोही ठाउँकी २३ वर्षीय सितला नाम गरेकी यात्रुको मृत्यु भएको प्रहरीले बताएको छ ।
दुर्घटनामा घाइते भएका १० जनामध्ये ५ जनालाई उपचारका लागि रुकुमपश्चिमको खंलगा लगिएको छ भने गम्भीर ५ जनालाई उपचारका लागि सुर्खेतबाट हेलिकप्टर मगाइएको इलाका प्रहरी कार्यालय बाँफिकोट, रुकुमपश्चिमका वरिष्ठ प्रहरी हल्वदार रामकुमारी विष्टले जानकारी दिएकी छिन् ।