काठमाडौँ । चर्चित अभिनेत्री तथा नेकपा एमालेकी नेतृ करिश्मा मानन्धर पार्टीका वरिष्ठ उपाध्यक्ष ईश्वर पोखरेललाई भोट माग्न घरदैलो गरिरहेकी छिन् ।
मानन्धरसँगै चलचित्र निर्देशक तथा निर्माता आकाश अधिकारी पनि घरदैलोमा सहभागी भएका छन् ।
काठमाडौं क्षेत्र नम्बर ५ बाट प्रतिनिधिसभा सदस्य उम्मेदवार पोखरेलको चुनावी अभियानलाई करिश्मा र आकाशले साथ दिएका हुन्।
आफू पनि काठमाडौं क्षेत्र नम्बर ५ को स्थायी बासिन्दा भएको बताउँदै अभिनेत्री मानन्धरले जनतामाझ भिजेका र क्षेत्रको विकासका लागि धेरै काम गरेको पोखरेलले यो क्षेत्रमा उनको विकल्प नभएको तर्क गरेकी छिन्।
देश विकासको लक्ष्य लिएर अगाडि बढेको एमालेले जिते मात्रै देशले काँचुली फेर्न सम्भव रहेको करिश्माले बताएकी छिन् ।
जनताले विकास के हो भन्ने राम्रो अनुभूति गर्न नपाएको बेलामा केपी शर्मा ओली नेतृत्वको सरकारबाट सम्भव भएको दावी गर्दै उनले एमालेले अघि सारेका योजना र एजेन्डालाई पूरा गरेर समृद्ध मुलुक, सुखी जनताको नारालाई सार्थकता तुल्याउन यो पटकको भोट एमालेलाई दिनुपर्ने तर्क गरेकी छिन् ।
काठमाडौं क्षेत्र नम्बर ५ मा एमालेबाट प्रतिनिधिसभामा पोखरेल तथा प्रदेशसभा ५ (१) मा नारायण सिलवाल र ५ (२) मा दीपक निरौला उम्मेदवार छन् ।
