काठमाडौं । नेपाली सेना कल्याणकारी बोर्डको समन्वय तथा संयोजकत्वमा नेपाली सेनाबाट निवृत्तिभरणमा रहेका भू.पू. सैनिक तथा तीनका एकल महिलाहरुको सहभागितामा आज प्रधान सेनापति प्रभुराम शर्माको प्रमुख आतिथ्यतामा कैलाली जिल्ला, तेघरीस्थित श्री भवानीदल गणमा आयोजना भएको ‘नेपाली सेना भूतपूर्व सैनिक सम्मेलन-२०७८’ कार्यक्रम सम्पन्न भएको छ ।
कल्याणकारी बोर्डका प्रमुख कार्यकारी अधिकृतबाट स्वागत मन्तव्य तथा प्रधान सेनापति महारथी प्रभुराम शर्माबाट दीप प्रज्वलन गरी समुद्घाटन भएको यस सम्मेलनमा कैलाली र कञ्चनपुर जिल्लाहरुमा बसोबास गर्ने करीब २३०० ९दुईहजार तीनसय० जना नेपाली सेनाका भूतपूर्व सैनिक तथा परिवारजनको सहभागिता रहेको थियो ।
उक्त सम्मेलनलाई सम्बोधन गर्नु हुँदै प्रधान सेनापति महारथी शर्माले नेपाली सेनाको संस्थागत मूल्य र मान्यताहरुलाई जीवन्त राख्न अवकाश प्राप्त अग्रज सैनिकहरूले गरेको निःस्वार्थ सेवा तथा भूमिकाको प्रशंसा गर्नु हुँदै सम्मेलनमा भूतपूर्व सैनिक तथा परिवारजनहरुको सक्रिय उपस्थितीले नेपाली सेनालाई थप हौसला मिलेको बताउनु भएको थियो । साथै उहाँले, नेपाली सेनाको श्रोत, साधन र क्षमताले भ्याएसम्म कल्याणकारी सेवा सुविधाहरु भविष्यमा थप विस्तार तथा अभिवृद्धि गर्दै लगिने विश्वास समेत व्यक्त गर्नु भएको थियो ।
सो कार्यक्रममा, कञ्चनपुर जिल्ला निवासी जेष्ठ भूतपूर्व सैनिक, ९३ (त्रियानब्बे) वर्षका हुद्धा खड्ग सिंह खत्री (अ.प्रा.) र श्री कालीजंग गण (तत्कालिन कालीजंग गुल्म) बाट अवकास प्राप्त स्वर्गीय जमदार घुमसिंह कठायत (अ.प्रा.) को श्रीमती, कैलाली जिल्ला निवासी, १०६ (एकसय छ) वर्षकी जेष्ठ एकल महिला श्रीमती भद्रकाली कठायतलाई सम्मान गरिएको थियो भने सर्वोत्कृष्ट उद्यमी व्यवसायीहरुलाई प्रशंसा–पत्र एवं पुरस्कार वितरण गरिएको थियो । उक्त समारोहमा, ४ वा सो भन्दा बढी सन्ततिहरुलाई नेपाली सेनामा सेवा गर्न अभिप्रेरित गर्ने ३ (तीन) जना आमा तथा बुवाहरुलाई सम्मान, फरक क्षमता भएका तथा अशक्त ५ (पाँच) जनालाई व्हिल चेयर, बैसाखी तथा आर्थिक सहयोग प्रदान गरिनुका साथै लघुबित्त कार्यक्रम एवं महिला उद्यमशिलता कर्जा प्राप्त गर्ने व्यक्तिहरुलाई चेक हस्तान्तरण गरिएको थियो ।
भू.पू. सैनिकहरुको तर्फबाट प्रादेशिक रथीबृन्द प्रतिनिधि तथा नेपाल राष्ट्रिय भूतपूर्व सैनिक संघका सभापतिबाट मन्तव्य एवं बलाध्यक्ष रथी सरोज प्रताप राणाको मन्तव्य सहित समापन भएको उक्त सम्मेलनमा, नेपाली सेनाका बहालवाला तथा अवकाश प्राप्त रथीवृन्द तथा अधिकृतहरु, कल्याणकारी बोर्डका प्रमुख कार्यकारी अधिकृत, नेपाल ईन्भेष्टमेन्ट बैंकका प्रमुख कार्यकारी अधिकृत, बहालवाला एवं अवकाशप्राप्त सैनिक तथा परिवारहरु र अन्य आमन्त्रित अतिथि तथा पत्रकारहरुको उल्लेख्य उपस्थिति रहेको थियो ।
उक्त सम्मेलनमा भू।पू। सैनिक तथा तीनका एकल महिलाहरुको तर्फबाट प्लेकार्ड सहितको मार्चपाष्टलगायत राष्ट्रिय सेवादलका क्याडेटहरुद्वारा मार्चपाष्ट, नेपाली सेनाद्वारा स्थान विशेषको झाँकी, संस्कृति झल्किने नाँच, खुकुरी ड्रिल, तेक्वान्दो पि.टि. र सैनिक व्याण्डको प्रस्तुती प्रदर्शन गरिएको थियो ।
यस सम्मेलनलाई लक्षित गर्दै मिति २०७८ चैत्र १० गतेदेखि ऐ. १२ गतेसम्म तेघरी ब्यारेक, कैलालीमा नेपाली सेनाद्वारा विशेषज्ञसहितको स्वास्थ्य शिविर संचालन गरि GOPD, MEDICINE, SURGERY, OBS/GYN, PAEDIATRICS, EYE, ENT, DENTAL, RADIOLOGY, PHARMACY, PATHOLOGY, ORTHOPEDIC लगायतका स्वास्थ्योपचार सेवा प्रदान गर्नुका साथै COVID-19 Vaccine नलगाएकाहरुको हकमा ख्बअअष्लभ को ब्यवस्था गरिएको थियो । यसका साथै, स्वास्थ्य शिविरमा आँखा चेकजाँच गराउँने सहभागीहरुलाई आवश्यकता अनुसार निस्शुल्क चस्मा समेत वितरण गरिएको थियो ।
यस प्रकारको सम्मेलनले अवकाश प्राप्त सैनिक व्यक्तिहरूको अवकाश पछिको जीवनमा थप उर्जा र शक्ति प्रदान गर्नुको साथै समाजमा सम्मानित जीवन यापन गर्दै सेनाप्रति सकारात्मक सोचको विकास एवं राष्ट्रिय एकतामा टेवा दिन थप उर्जा तथा हौसला मिल्ने विश्वास नेपाली सेनाले लिएको जनाएको छ ।
