मुगु । हिमाली जिल्ला मुगुकाे सोरु गाँउपालिकाअन्तर्गतका स्वास्थ्य चौकीमा सिटामोल समेत पाइन छाडेकाे छ । औषधि अभावका कारण उपचारका लागि चाैकीमा आएका बिरामीहरू उपचारविनै फर्कने गरेका छन् ।
विभिन्न तहका सरकारले हरेक वर्ष स्वास्थ्य क्षेत्र र औषधि खरिदमा लाखौँ बजेट विनियोजन गरे पनि सोरु गाउँपालिकामा वर्षैभरि औषधि अभाव भइरहने सोरु गाउँपालिका-६ सोरुकोटका बलिराज शाहीले बताए । जसका कारण दुर्गमका सर्वसाधारण सामान्य बिरामी हुँदा समेत ज्यान गुमाउन बाध्य छन् ।
स्वास्थ्य चौकी नार्थपुका अहेब टिकाराज आचार्यका अनुसार गाउँपालिकाबाट आउने औषधिले गत वर्ष जम्मा तीन महिना पुगेकाे थियाे । याे वर्ष अहिलेसम्म कुनै पनि तहकाे सरकारबाट औषधि आएको छैन । अब त सिटामोलसम्म पनि बाँकी नरहेकाे उनकाे भनाइ छ । औषधिका लागि धेरै पटक पालिकासँग माग गरे पनि नपाएकाे उनले बताए । चाैकीमा कहिलेकाहीँ सुत्केरी गराउन आउँदा समेत प्रयाप्त सामग्री अभाव हुने गरेकाे उनले बताए । ‘विद्युत् नहुँदा मोबाइलको लाइट बालेर सुत्केरी गराउन बाध्य छाैँ,’ स्वास्थ्य चौकी नार्थपुका अहेब आचार्यले भने । उनका अनुसार औषधिको अभावले स्टाेर पनि खाली भएकाे छ ।
सोरु गाउँपालिका स्वास्थ्य शाखाका संयाेजक कर्णबहादुर सावतका अनुसार आव २०७७/७८ मा खरिद गरेको औषधिले अहिलेसम्म काम चलेकाे छ । आव २०७८/०८९ को औषधि खरिद गर्न पालिकाबाट बजेट बिनियोजन गरे पनि प्रमुख प्रशासकीय अधिकृतहरूको फेरबदलले खाता सन्चालनलगायत नहुँदा पालिकाभित्र औषधिको चरम अभाव भएको हाे ।
