धनगढी । नेकपाका महासचिव नेत्रविक्रम चन्द विप्लवले आफैंले गरेको तीनबुँदे सहमति कार्यान्वयनबाट सरकार पछि हट्न थालेको आरोप लगाउनुभएको छ । तीनबुँदे सहमति भएको एक वर्षसम्म पनि कार्यान्वयन नभएको बताउँदै उहाँले सहमति कार्यान्वयन गर्न आनाकानी गरे फेरि विद्रोह हुने चेतावनी दिनुभएको छ ।
‘सहमति भएको एक वर्षसम्म पनि सरकार आफ्ना वाचा पूरा गर्न आनाकानी गरिरहेको छ,’ शनिबारदेखि धनगढीमा सुरु भएको दलित मुक्ति मोर्चा नेपालको पाँचौं राष्ट्रिय सम्मेलन उद्घाटन गर्दै महासचिव विप्लवले भन्नुभयो, ‘सहमति कार्यान्वयन नगर्नु सरकारको कमजोरी हो । हामीलाई घेराबन्दी पार्न खोजे फेरि विद्रोह हुन सक्दछ ।’
उहाँले आफ्नो पार्टीसँग हतियार नभएको बताउनुभयो । अहिले चौतर्फी रूपमा विप्लवसँग हतियार छ भन्ने आवाज उठ्न थालेको बताउँदै उहाँले आफ्नो पार्टीसँग कुनै हतियार नभएको बताउनुभयो ।
‘सरकारले आफ्नो पार्टीमाथि प्रतिबन्ध लगाउँदा कुनै चौकीमाथि हामीले आक्रमण गरेनौं,’ उहाँले भन्नुभयो, ‘न विदेशीसँग सहयोग माग्यौं । अनि कसरी हतियार हुन्छ । बिना प्रमाण किन आरोप लगाइँदै छ ?’
सरकारसँग वार्ता गरे पनि यो संविधान भने आफ्नो पार्टीले नमान्ने उहाँले बताउनुभयो । वार्तामा संविधान मान्नुपर्छ भन्ने सहमति नभएको बताउँदै उहाँले आफूहरूको एजेण्डा जनमत संग्रह भएको बताउनुभयो ।
‘संसदीय व्यवस्था पूर्ण रूपमा असफल भइसक्यो,’ उहाँले भन्नुभयो,‘यस्तो व्यवस्था मानेर कुर्सीमा बस्न यो पार्टी जन्मेको होइन । हाम्रो माग जनमत संग्रह गर्ने हो । त्यसैका लागि हामी संघर्ष गर्ने छौं ।’
