Margadarsan


  • देउवा सरकारको मौनताले नेपालमाथि भारतको दादागिरी बढ्दो

    कञ्चनपुरमा भारतीयको आक्रमणमा परी सशस्त्र प्रहरीका ३ जना घाइते

    मार्गदर्शन ५ आश्विन २०७८, मंगलवार

    धनगढी । नेपालमाथि भारतको दादागिरी बढ्दै गएको छ । नेपालमा देउवा नेतृत्वको सरकार गठन भएसँगै भारतले सीमा क्षेत्रमा नेपाली नागरिकमाथि अत्याचार गरेका प्रशस्त घटनाहरु देखिएका छन् । तर पनि देउवा सरकारले मौनता साँधेको साँधेकै छ । यसैको पछिल्लो घटना हो, कञ्चनपुरमा भारतीय तस्करको  आक्रमणमा नेपालका तीनजना सशस्त्र प्रहरी घाइते हुनु ।

    सोमबार साँझ करिब ८ बजेको समयमा दोधाराचाँदनी नगरपालिका–८ को कञ्जभोज नजिकै नेपाल–भारत सीमा क्षेत्रमा गस्तीमा खटिएका सशस्त्र प्रहरीको टोलीमाथि भारतीय तस्करको समूहले आक्रमण गरेका हुन् ।

    आक्रमणबाट सशस्त्र प्रहरीको बीओपी कञ्जभोजमा कार्यरत तीनजना जवान समान्य घाइते भएको सशस्त्र प्रहरी बल नेपाल नम्बर ३५ नम्बर गण शैलेश्वरीले जनाएको छ । घाइतेहरुको दोधाराचाँदनीस्थित स्थानीय स्वास्थ्य चौकीमा उपचार भइरहेको छ ।

    नेपालतर्फ विभिन्न समान तस्करी भइरहेको अवस्थामा सशस्त्र प्रहरीको गस्ती टोलीसँग भेट हुँदा एक्कासी उनीहरुले ढुङ्गामुढा गरेको सशस्त्र प्रहरी बल नेपाल नम्बर ३५ गण शैलेश्वरीका प्रमुख सशस्त्र प्रहरी उपरीक्षक (एसपी) वीरेन्द्र ऐरले बताउनुभयो ।

    तस्करको समूहलाई नियन्त्रणमा लिने प्रयास गरे पनि ३०/४० मिटर नजिकै भारतीय भूमि भएकाले उनीहरु भाग्न सफल भएको एसपी ऐर बताउनुभयो । ‘हामीले नियन्त्रणमा लिने कोसिस गर्दा उनीहरु भागेर भारतीय भूमिमै प्रवेश गरेपछि एसएसबी र भारतीय प्रहरीलाई जानकारी गराएका थियौं,’ ऐरले भन्नुभयो, ‘तत्कालै एसएसबी र भारतीय प्रहरी घटनास्थल पुगेको थियो । उहाँहरुले हामी उक्त समूहको पहिचान गरेर कारवाही गर्ने प्रतिबद्धता जनाउनुभएको छ ।’

    उहाँनका अनुसार भारतीय तस्करको समूहको पहिचान भइसकेको छ र मंगलबार तस्करको समूहलाई नियन्त्रणमा लिएर कानून बमोजिम कारवाही गर्ने आश्वासन भारतीय पक्षले दिएको छ ।

    नेपाल–भारत सीमा क्षेत्रमा बेलाबखत गस्तीमा खटिएका सुरक्षाकर्मीमाथि तस्करको समूहबाट आक्रमण हुँदै आएको छ । पर्याप्त पूर्वतयारीको अभाव र दुवै देशका सुरक्षा अधिकारीबीचको कमजोर समन्वयका कारण यस्ता घटना दोहोरिदै गएको अधिकारीहरु बताउँछन् ।

    उता सशस्त्र प्रहरीमाथि आक्रमण गरेको केही घण्टापछि नै भारतीय तस्करको समूहका एकजना पक्राउ परेका छन् ।

    कञ्चनपुरका प्रमुख जिल्ला अधिकारी रामप्रसाद पाण्डेले कुमारलाई पक्राउ गरेर कारबाही प्रक्रिया अघि बढाएको जानकारी प्राप्त भएको बताउनुभयो ।

    फेसबुक प्रतिक्रिया