बुटवल । प्रमुख प्रतिपक्षी दल नेकपा एमालेका नेता टोपबहादुर रायमाझीले विगतमा असफल भएका नेताहरुको महागठबन्धनले एमालेविरुद्ध घेराबन्दी गर्ने चेष्टा गरेको बताउनुभएको छ । नेकपा एमाले रुपन्देहीको कार्यकर्ता भेलालाई बुधबार बुटवलमा सम्बोधन गर्दै उहाँले एमालेविरुद्ध असफल नेताहरुको गठबन्धनले घेराबन्दी गर्ने कोशिश गरेको बताउनुभयो ।
कांग्रेस, माओवादी केन्द्र, एकीकृत समाजवादी र जसपाको गठबन्धनलाई असफल नेताहरुको महागठबन्धन भन्दै उहाँले त्यसलाई एमालेले असफल पारेर फेरि सत्ताको नेतृत्वमा पुग्ने विश्वास व्यक्त गर्नुभयो ।
नेता रायमाझीले भन्नुभयो ‘विगतमा असफल भएका नेताहरुको महागठबन्धनले एमालेविरुद्ध घेराबन्दी गर्ने चेष्टा गरेको छ । तर एमालेले त्यो घेराबन्दीलाई असफल पार्ने र फेरि सत्ताको नेतृत्वमा पुग्छ ।’ एमाले र माओवादी केन्द्रबीचको एकता हुँदा माओवादी केन्द्रका अध्यक्ष पुष्पकमल दाहाल प्रचण्डले पापी मन राखेर एकता गरेको रायमाझीले आरोप लगाउनुभयो । पदका लागि प्रचण्डले पार्टी एकता तोडेको उहाँको आरोप छ ।
माओवादी केन्द्र कांग्रेसको पुच्छर बनेको भन्दै उहाँले कांग्रेसको नेतृत्वमा देशमा समृद्धि नआउने ठोकुवा गर्नुभयो ।
