काठमाडौं । नेकपा एमालेबाट विभाजित भएको माधवकुमार नेपाल नेतृत्वको नेकपा (एकीकृत समाजवादी) जबजविरोधी झलनाथ खनालले पार्टीको राजनीतिक प्रतिवेदन लेखनको जिम्मेवारी पाएका छन् ।
नेकपा (एस) भित्र तत्कालिन एमालेका महासचिव मदन भण्डारीद्वारा प्रतिपादित जनताको बहुदलीय जनवाद (जबज) लाई मार्गदर्शक सिद्धान्त मान्ने कि नमान्ने भन्ने बहस चलिरहेका बेला ‘जबजविरोधी’ खनाललाई राजनीतिक प्रतिवेदनको जिम्मेवारी एकीकृत समाजवादीले दिएको छ ।
नेकपा एमालेको पाँचौं महाधिवेशनमा भण्डारीले जबज प्रस्ताव गर्दा ‘दक्ष प्रजापतिको टाउको’ भनी व्यंग्य गर्ने खनालले पार्टी दर्ता गर्नुअघि चन्द्रागिरि सम्मेलनलाई नयाँदिल्लीस्थित एपोलो अस्पतालबाट सम्बोधन गर्दै ‘जबजको युग समाप्त भएको’ घोषणा गरेका थिए ।
उनले नेकपा (एस)ले नयाँ राजनीतिक कार्यदिशा बनाउनुपर्ने प्रस्ताव गर्दै दिल्लीबाट मञ्जुरीनामासहित समाजवादीमा सनाखत समेत गरेका थिए । १४ भदौमा स्वदेश फर्किएपछि खनाललाई नेकपा (एस) ले १३ सदस्यीय राजनीतिक प्रतिवेदन लेखन नेतृत्वको जिम्मेवारी सुम्पिएको छ ।
उनै खनाल नेतृत्वको राजनीतिक प्रतिवेदन लेखन समिति सदस्यमा जबजमा नै विद्यावारिधि गरेका डा. बेदुराम भुसाल, एमाले प्रदेश सांसदबाट निष्काशित प्रकाश ज्वाला, महासचिवका दावेदारद्धय गंगालाल तुलाधार र बिजय पौडेल, प्रदेश १ का मुख्यमन्त्रीका दावेदार राजेन्द्र राई, सम्भावित मन्त्रीका सूचीमा रहेका जगन्नाथ खतिवडा र रामकुमारी झाँक्रीसहित केशवलाल महर्जन, सावित्रा भुसाल र गणेश विश्वकर्मा रहेका छन् ।
मिति तय नभएको राष्ट्रिय सम्मेलनमा सो राजनीतिक प्रतिवेदन पेश गर्ने उद्देश्यसहित खनाल नेतृत्वमा राजनीतिक प्रतिवेदन लेखनको काम भएको छ । मृगौला प्रत्यारोपण गरेर स्वदेश फर्किएका खनाल नेतृत्वको समितिलाई एक महिनाभित्र राजनीतिक प्रतिवेदन तयार पारिसक्नुपर्ने समयसीमा तोकिएको बताइएको छ ।