राष्ट्रपति भण्डारीद्वारा चार मन्त्रीको पुनर्नियुक्ति

काठमाडौँ– नेकपा (माओवादी केन्द्र) ले कारबाही गरेका चार पूर्व मन्त्रीलाई आज पुनः मन्त्री नियुक्त गरिएको छ ।
राष्ट्रपति विद्यादेवी भण्डारीले सरकारको सिफारिसमा शुक्रबार टोपबहादुर रायमाझी, लेखराज भट्ट, प्रभु साह र गौरीशंकर चौधरीलाई मन्त्री पुन नियुक्त गर्नुभएको हो ।
प्रधानमन्त्री केपी शर्मा ओलीको सिफारिसमा उहाँहरूलाई मन्त्री नियुक्त गरिएको राष्ट्रपति कार्यालयले जनाएको छ।
राष्ट्रपति कार्यालयले एक विज्ञप्ति जारी गर्दै प्रधानमन्त्री केपी शर्मा ओलीको नेतृत्वमा २०७४ फागुन ३ गते गठित मौजुदा मन्त्रिपरिषदमा नेपालको संविधानको धारा ७८ को उपधारा (१) बमोजिम प्रधानमन्त्रीको सिफारिसमा चारजनालाई मन्त्री गरी कार्यभार समेत तोकिएको जनाएको छ ।
सरकारले सिफारिस गरिएका मन्त्रीहरुमा रायमाझी ऊर्जा, जलस्रोत तथा सिंचाई, भट्टराई उद्योग, वाणिज्य तथा आपूर्ती, साह शहरी विकास र चौधरी श्रम, रोजगार तथा सामाजिक सुरक्षा मन्त्रीमा नियुक्त हुनुभएको छ । उहाँहरु यसअघि जुन जुन मन्त्रालयमा कार्यरत रहनुभएको थियो त्यही मन्त्रालयमा पुनर्नियुक्ति गरिएको छ ।